O Festival TerraCeo bota o peche cunha marca de 11.000 asistentes e unha V Edición no forno

Música coas Illas Cíes de fondo, cun atardecer de ilusión de pano e co único teito das estrelas que nos arroupan. Se xa o escenario é idílico, os invitados a formar parte do Festival TerraCeo non desmerecen nin moito menos o lugar. Na súa última edición o festival vigués congregou a 11.000 persoas na terraza do Aduditorio Mar de Vigo en decenas de concertos únicos que fan deste o festival máis longo de Galicia, con actuacións de maio a setembro e con éxito de crítica e de público. 

Totalmente asentado na cidade e na oferta cultural de Galicia, o TerraCeo é unha experiencia para o público pola oportunidade que supón para estar tan preto das súas bandas favoritas. Deixaron pegada no Auditorio formacións de primeira liña como Arde Bogotá, A A Love You, Tinariwen ou !!! (Chk Chk Chk), así como artistas internacionais da talla de Julieta Venegas ou apostas locais como Hard GZ, encargado de botar a persiana até o ano que vén. 

Unha mestura de estilos que fixeron vibrar aos asistentes e situaron a Vigo como capital da música durante todo o verán. Visto o resultado, os organizadores xa anuncian que o TerraCeo ten moita corda e que xa está en marcha a confección da V Edición. O escenario é inmellorable; a programación incontestable. Preparados para que volva o tempo de terrazas.