Investigan as estafas pola revenda de entradas para o concerto de David Guetta en Castrelos

Policía Nacional e Garda Civil de Pontevedra confirmaron a presentación de varias denuncias relacionadas coa posible comisión de estafas na revenda de entradas do concerto que David Guetta ofreceu no Auditorio Municipal de Castrelos, en Vigo, o pasado 20 de agosto.

A Comandancia da Garda Civil de Pontevedra informou da presentación de, polo menos unha denuncia, no posto do Grove; mentres que fontes da Comisaría da Policía Nacional de Vigo, confirmaron que se abriu investigación pola presentación de varias denuncias relativas a esta situación.

O concerto de David Guetta, enmarcado nun evento no que participaron outros DJ, foi organizado polo Concello de Vigo, que puxo á venda 5.000 entradas para a platea do Auditorio (o acceso á bancada é gratuíto), a metade delas en despacho de billetes físico e a outra metade a través de internet, a un prezo de 15 euros, moi por baixo do que custan habitualmente as entradas para un show do artista francés.

Os tiquets non son nominais, o que facilita a revenda, e en redes sociais proliferaron as mensaxes de persoas que ofrecían as súas entradas, algunhas a prezos que multiplicaban por 15 ou 20 o custo orixinal. Así mesmo, houbo oferta de entradas en plataformas de internet como Milanuncios ou Viagogo.

As forzas policiais han confirmado a presentación de varias denuncias por estafa, entre elas persoas que pagaron pola entrada e nunca a recibiron, ou quen alertaron de que un usuario ofrecía os mesmos tiquets a varias persoas. Ademais, en redes sociais, algunhas persoas xa están a alertar contra perfís que tentan revender entradas para o concerto de Duki, que se celebrará o sábado na cidade olívica.