En liberdade o detido por agresión sexual o domingo nun local de lecer da Coruña

Despois de pasar a diposición xudicial, o investigado foi posto en liberdade logo de ser detido durante a madrugada do día 29 de xaneiro, tras unha presunta agresión nos Cantóns Village.

Os feitos polos que foi procesado, tras a denuncia dunha muller, sucederon entre as 4 e as 7 horas, cando, segundo o relato, realizou tocamentos á denunciante sen o seu consentimento e tentou bicala na boca.

O Xulgado de Instrución número 2 da Coruña decretou a posta en liberdade, sen medidas, pero investigado por un delito de agresión sexual, para o home detido o domingo por tocamentos a unha muller nun local de lecer.

O home, que foi arrestado na madrugada do pasado domingo, día 29, por presunta agresión sexual a unha muller nun establecemento situado no complexo de lecer Os Cantóns Village, pasou este martes pola tarde a disposición xudicial.

Así o confirmaron fontes policiais consultadas por Europa Press. Segundo as mesmas, os feitos polos que se lle investiga sucederon entre as 04,00 e as 07,00 horas. Supostamente, o home realizou tocamentos á denunciante sen o seu consentimento e tentou bicala na boca cando ambos se atopaban nun pub.

A detención produciuse despois de que os porteiros do establecemento tivesen que intervir ante o suceso e alertasen ás autoridades.

O arrestado foi conducido ás dependencias da Policía Nacional en Lonzas onde permaneceu até este martes, día 30, que pasou a disposición xudicial, segundo confirmaron as mesmas fontes.

Posteriormente, desde o xulgado decretouse a súa posta en liberdade, investigado por agresión sexual, precisaron desde o Tribunal Superior de Xustiza de Galicia (#TSXG).