Leiceaga reprocha que se traspasen en público "límites" nos debates das primarias

|

Leiceaga grupoparl


O portavoz parlamentario do PSdeG, Xoaquín Fernández Leiceaga, opinou que o seu partido debe "organizar mellor" as primarias porque, ao seu xuízo, existen "límites ao debate político que se pode dar en público" que "non se deberían traspasar".


Leiceaga fixo esta reflexión nunha entrevista, na que defendeu que desde a dirección do partido "non hai ningún ánimo" de apoiar explicitamente a ningunha candidatura para as secretarías provinciais, aínda que recoñece que, evidentemente, cada un ten "a súa posición".


"Saia quen saia son todos militantes do partido, militantes coñecidos e cualificados. Hai que traballar con eles a partir da súa elección, da mellor maneira posible e sen que existan friccións", remarcou.


Así, aseverou que, tras as primarias provinciais --que se iniciaron este domingo en Pontevedra e Lugo--, os seguintes pasos a seguir son "marcar as posicións políticas" desde a dirección do partido para "impulsar un traballo máis eficiente na organización", unha tarefa na que está convencido que as estruturas provinciais "van colaborar realmente".


PRIMEIRAS SECRETARÍAS RENOVADAS


O concelleiro vigués David Regades e o actual portavoz da Deputación de Lugo, Álvaro Santos, resultaron vencedores nas primarias á secretarías provinciais do PSOE de Pontevedra e Lugo, respectivamente, celebradas este domingo.


Ás 20,00 horas da noite pecháronse as votacións para a elección dos responsables provinciais do PSdeG-PSOE, que encara a súa última fase de renovación interna tras a elección de Gonzalo Caballero como secretario xeral nas primarias celebradas o pasado mes de outubro.


AFÍN A CABALLERO


Así, en Pontevedra e cunha participación da militancia do 66 por cento, o concelleiro no Concello de Vigo David Regades resultou vencedor das primarias ao recibir 1062 votos polos 805 que solicitou o outro candidato en liza, o redondelano Eduardo Reguera.


Regades, afín ao rexedor olívico, Abel Caballero, relevará a Santos Héctor como secretario provincial do PSOE pontevedrés, que celebrará o seu congreso o vindeiro sábado 16 de novembro, onde os resultados deste domingo deberán ser ratificados.


Trátase, deste xeito, da primeira vitoria colleitada nos últimos procesos internos polo sector socialista vigués capitaneado polo seu alcalde, Abel Caballero, que apoiou as candidaturas de Susana Díaz e Juan Díaz Villoslada nas primarias federais e galegas.


CONTINUIDADE EN LUGO


Na provincia lucense, o actual portavoz da Deputación de Lugo, Álvaro Santos, impúxose nas primarias con 747 votos polos 373 do alcalde de Castroverde, José María Arias, e os 295 apoios recibidos pola tenente de alcalde de Burela, Patricia Otero.


O 72 por cento dos 2.107 afiliados socialistas da provincia de Lugo participaron este domingo nas votacións, nas que non houbo sorpresa, xa que o socialista de Friol partía co cartel de favorito.


Álvaro Santos, que conta co apoio do presidente provincial, entre outros cargos, converterase no novo secretario do PSOE lucense, que pon fin a dous anos de interinidade baixo a dirección dunha xestora.


A vitoria de Santos, considerado a continuidade do 'besteirismo', deberá agora ser ratificada no congreso provincial dos socialistas de Lugo, previsto para o venres 22 de decembro.


relacionada Os dous candidatos ás primarias do PSOE na Coruña presentan os seus avais
relacionada Gonzalo Caballero defende a "neutralidade" da cúpula nas primarias provinciais
relacionada Gonzalo Caballero reclama deixar atrás "o modelo de baronías" nas primarias provinciais

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress