O Sergas mantén camas pechadas nos hospitais de Pontevedra

Hospital Montecelo, de Pontevedra.

O sindicato Prosagal celebrou este martes dúas concentracións ante os hospitais Provincial e Montecelo debido á prolongación máis aló do prazo previsto do peche de camas na área sanitaria de Pontevedra e esixiu a súa apertura.

Así, a portavoz de Prosagal, Carolina Iñarrea, esixiu a apertura ao completo das unidades afectadas, Pneumoloxía e Medicina Interna ao entender que "este peche non se pode xustificar", xa que "hai máis de 50 enfermos periféricos en todo o hospital que encherían esas camas pechadas, e mesmo quedarían curtas", asegurou.

Estes traballadores sanitarios lamentan a "tomadura de pelo" pola "falta de compromiso da xerencia" en canto ao día en que se reabrirán as unidades pechadas e a falta dunha comunicación oficial de cando pensan que volverá todo á actividade normal.

Entre outras consecuencias, Iñarrea advertiu de que o peche de camas supón un "colapso" no servizo de Urxencias, no incremento dos tempos de espera para os ingresos, a mestura de pacientes con distintas patoloxías e a "sobrecarga de traballo" nas plantas que permanecen abertas. Ademais, alertou de que a situación redunda na calidade asistencial para os pacientes.

Así mesmo, a portavoz de Prosagal puxo como exemplo a situación vivida este venres "con seis pacientes que pasaron a noite nunha padiola en Urxencias habendo camas dispoñibles". E apuntou que "están a derivar á privada aos pacientes cirúrxicos", mentres que nas plantas que lles correspondían na sanidade pública "están a ingresar ás patoloxías crónicas, que son as que non quere a privada".

Tamén Prosagal explicou que na pasada madrugada "abriu a Unidade de Pneumoloxía ao completo porque a saturación de Urxencias era moi grande e non había outra", unha apertura que se produciu con persoal eventual contratado e "coa previsión de que volva pechar este mércores".

Este sindicato expresou o seu "enfado e indignación" por esta decisión xa que "non se entenden que se pechen servizos sanitarios básicos" e "porque hoxe son esas unidades e mañá será calquera outra".