A patronal do transporte segue quedando atrás na solución ao conflito

|

AutobusesautocaresPrincipio de acordo entre sindicatos e consellería.


A Consellería de Infraestruturas e os sindicatos do sector do transporte de pasaxeiros alcanzaron este venres un principio de acordo en relación ás cláusulas sociais dos novos convenios deste servizo, aínda que se mantén a convocatoria de folga á espera de pechar "flocos" en materia económica e de que a patronal dea "pasos".


CIG, UXT e CCOO reuníronse durante máis de dúas horas coa conselleira de Infraestruturas, Ethel Vázquez, para tratar de avanzar na solución do conflito que xa acumulou seis xornadas de folga e que prevé facer os paros definitivos a partir do próximo xoves.


Así, Xesús Pastoriza, da CIG, apuntou que o documento sobre as cuestións sociais que a Xunta lles presentou este venres "recolle moitas" das súas "reclamacións", polo que consideran que, a falta de revisalo en profundidade, "hai un acordo" en cláusulas sociais.


Do mesmo xeito Marcos Pérez, de CC.OO. mostrouse satisfeito cos "avances" en materia social, aos que aínda quedan "algúns flocos". "Esperamos poder pechar un acordo neste ámbito", sentenciou.


Finalmente, a representante de UXT, Beatriz Meilán, indicou que estudarán durante os próximos días a proposta da Xunta e manterán un encontro a principios da próxima semana para darlles ou non o visto e prace.


MÁIS PASOS


Como aspectos aínda sen resolver para concluír a folga, Xesús Pastoriza lembrou que, a pesar dos acordos, "o plan segue tendo os mesmos defectos" e, en particular, os sindicatos afearon o descoñecer datos relativos á dotación e repercusión económica.


Do mesmo xeito, reclamaron á patronal que tamén "de pasos" para "desbloquear" a negociación dos convenios colectivos provinciais, que aínda está "pendente".


AVANCES IMPORTANTES


Ethel Vázquez destacou tamén os resultados do encontro deste venres, nos que se avanzou "en aspectos importantes" en materia social. "Estamos a falar de avances para dar garantías na estabilidade laboral, para trasladar tranquilidade aos traballadores, que é o que nos preocupa", sentenciou a conselleira.


No referente á patronal, que este xoves daba por rotas as negociacións, lembroulles que a Xunta mantén "as portas abertas" para "construír entre todos este proceso".


"CHOQUE DE TRENS"


O portavoz parlamentario do PSdeG, Xoaquín Fernández Leiceaga, alertou da "discrecionalidade" que o plan de transporte, na súa formulación actual, deixa á Xunta na concesión das liñas e acusouna de provocar "un choque de trens" na negociación, á vez que defendeu que "máis recursos" permitirían liquidar "algúns problemas".


"O choque de trens que provoca a Xunta non é unha boa política; aínda existe marxe para negociar", defendeu Leiceaga, nunha xornada parlamentaria sobre o plan do transporte organizada polos socialistas, na que participaron diversos axentes implicados de sindicatos, Ampas e federacións de empresas do sector como Transgacar e Fegatravi.


Ante o temor manifestado por algunhas empresas, Leiceaga tamén incidiu na "discrecionalidade" que o documento que expón a Xunta lle deixa para, chegado o momento, determinar as adxudicatarias en base a criterios "políticos" e "non obxectivos". Pero tamén manifestou outras "preocupacións".


Entre elas, apuntou o extenso prazo para ratificar a oferta definitiva do novo mapa do transporte de viaxeiros por estrada (co horizonte de 2019) e a que "non se aproveite", por exemplo, para reorganizar o transporte metropolitano. Tamén incidiu na necesidade de garantir "a seguridade" no transporte escolar compartido.


En definitiva, apelou a que o plan do transporte sexa "unha oportunidade" e, ante os prazos cos que traballa a Xunta --o presidente, Alberto Núñez Feijóo, incidiu en que a licitación debe activarse a semana próxima--, advertiu de que, se o conflito "non se resolve ben", o PSdeG activará "procedementos parlamentarios extraordinarios" para que a Xunta responda na Cámara no verán.

relacionada Galicia quedará sen autobuses a partir da semana que vén
relacionada A Xunta segue adiante co seu plan de transporte co conflito enquistado

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress