Ferreiro propón un 'distrito do mar' e un museo na fachada marítima coruñesa

|


Xulioferreiroalcaldeacoruaforumeuropa


O alcalde da Coruña, Xulio Ferreiro, propuxo a creación dun "distrito do mar" e un museo na fachada marítima da cidade, en concreto nos peiraos de San Diego e nos de Batería e Calvo Sotelo, respectivamente.


Durante a súa participación no almorzo informativo 'Fórum Europa. Tribuna Galicia', defendeu que esta zona está nestes momentos "hipotecada" polos convenios asinados en 2004 con motivo da execución do Porto Exterior.


Sobre eles, cuestionou que se propoñan, no caso de Calvo Sotelo e Batería, "50.000 metros cadrados edificables con edificios de 9 alturas e un 88% de usos terciarios". En canto aos peiraos de San Diego, precisou que están proxectadas "máis de 4.000 vivendas".


Así mesmo, dixo que se trata de convenios "pensados para unha época que xa non existe". Por ese motivo, avogou por substituílos, no marco das negociacións con Portos do Estado e a Autoridade Portuaria, por un modelo que "decida" a cidade.


Para iso, lembrou a intención do goberno local de impulsar unha consulta cidadá. Mentres, avogou por crear un consorcio público, coa presenza de distintas administracións, ademais outras entidades como a Cámara de Comercio, para crear "un novo marco de colaboración".


"PACTO DE CIDADE"


"Necesitamos un pacto de cidade", dixo ao insistir na necesidade de deixar "sen efecto" os convenios de 2004. En particular, para os peiraos de Calvo Sotelo e Batería, expuxo crear unha "alameda sobre a auga" con zonas verdes e equipamentos dotacionais, ademais dun museo dedicado ao mar e que lembre a emigración que partiu do porto da Coruña.


No caso de San Diego, propuxo un "distrito do mar vinculado á economía azul" con actividade científica, tecnolóxica e empresas vinculadas coa innovación e relacionadas con sectores como a pesca, as enerxías renovables ou a acuicultura, entre outras.


ORZO


Antes, o alcalde defendeu o orzamento para este ano, aprobado de maneira inicial e cunha dotación de 245 millóns euros. "Deseñado por primeira vez polo goberno local", recalcou.


Ademais, destacou, das partidas, os 16 millóns incluídos para mobilidade, outros 27 millóns para servizos sociais ou 36 millóns para espazos públicos. En liña co seu discurso nas últimas datas defendeu, xunto á definición do bordo litoral, como "desafíos" da cidade a área metropolitana e a mobilidade.


Noutra orde de cousas, e preguntado polo centro de saúde de Santa Lucía, asegurou que está a esperar que a Consellería de Sanidade responda á súa petición dunha reunión.


"Levamos desde xuño de 2016 esperando un documento con especificacións técnicas", sinalou ao insistir en que hai que determinar se é posible compatibilizar o centro de saúde co mercado.

relacionada Xulio Ferreiro planea unha consulta cidadá coma a de Carmena

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress