Gas Natural Fenosa lanza un plan nacional para persoas vulnerables

Gas Natural Fenosa destinará 4,5 millóns de euros á posta en marcha dun novo Plan de Vulnerabilidade enerxética en toda España cuxo obxectivo será intensificar as actuacións que xa viña realizando, sistematizar a xestión de clientes vulnerables e fortalecer a colaboración con administracións públicas e entidades do Terceiro Sector.

As iniciativas, aprobadas polo consello de administración e que xa se están activando, permiten á compañía facer un seguimento integral dos posibles clientes vulnerables, afirma a compañía nunha nota de prensa. As accións responden ao compromiso de actuación de Gas Natural Fenosa ante situacións de vulnerabilidade.

Como parte das medidas operativas, a empresa pon en marcha unha Unidade de Atención á Vulnerabilidade co obxectivo de facer un seguimento de todos aqueles casos de clientes que poidan atoparse en situación vulnerable.

Xunto a esta unidade, a compañía desenvolverá un Grupo de Xestión de Colectivos Especiais. Desta forma, Gas Natural Fenosa conta, desde xaneiro de 2017, cun equipo de aproximadamente 60 persoas dedicadas á atención a cidadáns vulnerables.

En liña con estas dúas novas unidades, a empresa activou unha liña telefónica gratuíta para atender clientes en situación de vulnerabilidade (900 724 900).

Dentro das actuacións deseñadas, Gas Natural Fenosa formará os seus equipos e empresas colaboradoras para actuar en situacións de vulnerabilidade. Así mesmo, deseñará medidas para identificar e actuar ante situacións de risco de posibles clientes vulnerables.

DOUS ANOS PARA DEVOLVER A DÉBEDA

Entre o paquete de medidas, a compañía tamén ofrecerá flexibilizar o pago dos recibos aos clientes vulnerables, ampliando, entre outros aspectos, o período de devolución da débeda ata dous anos e eliminando a cota inicial.

Doutra banda, a Fundación Gas Natural Fenosa reorientará a súa actividade para dar un maior peso a todas as iniciativas sociais, especialmente as dirixidas a paliar a vulnerabilidade enerxética.

A través da fundación, Gas Natural Fenosa lanza unha liña de axudas para entidades sociais que traballen con persoas vulnerables. O obxectivo é que estas entidades do Terceiro Sector teñan recursos adicionais para desenvolver iniciativas de eficiencia enerxética e seguridade nos fogares.

En colaboración con diversas entidades sen ánimo de lucro, a Fundación colaborará para buscar alternativas que atopen medidas para axudar ás persoas afectadas por problemáticas concretas que provoquen pobreza enerxética.

Outra das iniciativas é a creación da Escola de Eficiencia Enerxética, cuxo obxectivo será apoiar a entidades do terceiro sector. No caso dos Servizos Sociais municipais, esta escola asesorará e formará ao seu persoal en materia de vulnerabilidade enerxética.

VOLUNTARIADO

Xunto a isto, en 2017 a fundación impulsará, coordinará e financiará un programa de voluntariado corporativo solidario. En colaboración con outras fundacións, a compañía está a desenvolver xa un programa piloto orientado á rehabilitación e conservación enerxética de edificios de colectivos vulnerables.

"A compañía enerxética desenvolveu desde sempre unha política proactiva contra a pobreza enerxética que cobre máis do 93% dos seus clientes en España, baseada en convenios e na cooperación e información dos servizos sociais municipais", afirma a empresa.

CONVENIOS

Actualmente, a empresa ten convenios e acordos asinados con 8 comunidades autónomas (Cantabria, Castela-A Mancha, Castela e León, Comunidad de Madrid, Galicia, Comunidade Valenciana, Navarra e Euskadi), con grandes concellos, coma o de Zaragoza ou Sevilla; así como con entidades supramunicipais, por exemplo a área Metropolitana de Barcelona, que agrupa 36 municipios cataláns.

Ata a data, Gas Natural Fenosa paralizou o corte de subministración a 18.000 clientes vulnerables, de 1.175 poboacións en todo o país, cuxa situación foi trasladada polas administracións.