​Asemblea para "reprobar" ao alcalde de Touro por non presentar alegacións contra o proxecto mineiro

O grupo Marea Veciñal de Touro anunciou a convocatoria dun pleno extraordinario no consistorio de Touro o vindeiro luns 2 de novembro ás 13:30 horas para buscar explicacións dos motivos que levaron ao goberno municipal, encabezado por Ignacio Codesido, a non presentar informes contra o proxecto de reapertura da mina unha vez xa finalizou o prazo para presentar os mesmos.

Terreos da mina de Touro

Na orde do día da convocatoria extraordinaria do próximo luns figura como primeiro punto do día a "reprobación ao señor alcalde -Ignacio Codesido-  por non presentar informes ao proxecto de reapertura da mina de Touro, unha vez recibiu o Concello oficio do 02/09/2019 coa documentación actualizada polo promotor".

Para Marea Veciñal de Touro, a postura de Codesido de descartar presentar alegacións aos últimos informes sobre o proxecto mineiro presentados por Cobre San Rafael supón deixar aos veciños " nunha situación de indefensión" e darlle así " barra libre á mineira para que decida sobre o futuro de todo a veciñanza".

Ademais, a orde do día indica que, no caso de que procesa, aprobarase un informe complementario ao expediente de tramitación da Avaliación Ambiental do proxecto mineiro e declarar ao municipio como 'Concello agrario'.

"XA ABONDA DE BURLAS"

En liñas similares pronúncianse ADEGA e a Plataforma pola Defensa da Ría de Arousa, que despois de revisar os últimos informes de Cobre San Rafael consideran que xa é "suficiente papelada" e que a Xunta non debe esperar máis para darlle as costas ao proxecto de forma definitiva.

As plataformas consideran que a promotora non deu paso para resolver os problemas que lle dispuxo Augas de Galicia e que a empresa supedita as reparacións a unha vez que lle concedan a Declaración de Impacto Ambiental.

"O reiterado recurso de invocar a consecución da autorización ambiental como condición previa para cumprir coas demandas do ente público, ou o feito de negarse a fornecer algúns dos datos  requiridos, apoian a conclusión de Augas de que hai aspectos relevantes 'sobre os que non se achega ningunha novidade'. Mesmo poderíase dicir que a actitude de Cobre San Rafael é non querer cumprir cos requirimentos da administración", denuncian as plataformas, antes de concluír que "xa abonda de burlas" e que está en man da Xunta "poñer fin a este culebrón administrativo".