Centenares de celadores protestan contra o SERGAS en defensa das súas prazas e contra a privatización

Unha nova asociación, que suma centos de membros nun par de semanas, promove unha protesta fronte a San Caetano na que participa o líder do PSdeG

Varios centenares de persoas, unhas 400 segundo os organizadores, manifestáronse este mércores en Santiago de Compostela convocadas pola Asociación de Celadores Galegos (ACeG) para reclamar ao Sergas que paralice a "reconversión de prazas" deste persoal noutras categorías en Atención Primaria e Puntos de Atención Continuada (PAC).

Manifestación hoxe en Santiago coa presenza do líder da oposición Gonzalo Caballero | Ana Fergo Celadores Galicia Facebook

En declaracións a Europa Press, un dos portavoces da asociación, Miguel Babío, defendeu a mobilización para manter os seus dereitos e "os postos de celadores nos centros de saúde e PACs".

Con motivo da mobilización, representantes da asociación, de recente constitución, --cuns 300 afiliados en toda Galicia en 15 días-- entregaron no rexistro da Xunta e do Sergas un total de 7.864 firmas recollidas durante unha semana nos distritos sanitarios da Comunidade galega.

PROFESIONAIS PROCEDENTES DE DIFERENTES LOCALIDADES

Baixo o lema 'En loita pola recuperación das nosas prazas da Atención Primaria e PACs', a marcha partiu de San Caetano pasadas as 17,25 horas desde a entrada principal da Xunta, para acabar fronte á sede da Consellería de Sanidade en San Lázaro, onde deron lectura a un comunicado coas súas reivindicacións.

Os manifestantes, que chegaron en autobuses e outros medios desde distintas localidades de toda Galicia, fixeron soar chifres e corearon consignas como 'mans arriba isto é un atraco' e 'celadores unidos xamais serán vencidos'.

Esta asociación rexeita "a eliminación de postos de celador en Atención Primaria e PAC" onde, asegura este colectivo, son substituídos "por outra categoría creada polo Sergas e que non existe noutras comunidades autónomas que forman parte do sistema nacional de saúde".

Así, defende as funcións que en Galicia os celadores "levan desenvolvendo desde 1971" nos hospitais e centros de Atención Primaria e PAC de Galicia "con responsabilidade e eficiencia".

PRECARIEDADE
Así mesmo, reivindican que se recoñeza a súa cualificación en función dun real decreto de decembro de 2011, publicado en xaneiro de 2012 no Boletín Oficial do Estado, que, denuncian, "non está desenvolto" en Galicia.

As súas demandas inclúen tamén que se oferte "o 100%" das prazas vacantes no concurso de traslado e OPE, que se acaba coa "precariedade nos contratos de traballo" e rexeitan "a privatización dos servizos sanitarios públicos".

Respecto diso, outro dos portavoces, Anxo Bergueiro, puntualizou, en declaracións a Europa Press, que, como en "outras" categorías no ámbito sanitario, para celadores hai "contratos por día" e outros, "nos que non teñen dereito a vacacións". "Non podes organizar nada na túa vida", apostilou.

Tamén lamentou que "coa perda de prazas redúcese a posibilidade de contratación" e que os celadores "poidan ir a un PAC cando levan moitos anos nun hospital", concluíu.