O SERGAS prevé ofertar 129 prazas para a formación de médicos de familia, a maior da súa historia

O Servizo Galego de Saúde (Sergas) trasladou ao Ministerio de Sanidade a "maior oferta de prazas" para a formación de profesionais especialistas de Atención Primeira da súa historia e así "paliar a escaseza de facultativos nalgunhas especialidades".

Segundo destacou este sábado a Xunta nun comunicado, en comparativa co ano anterior, rexistrarase un incremento "importante" na formación para as especialidades de pediatría, medicina de familia e enfermería familiar e comunitaria, que serán financiadas ao 100% polo Sergas.

En concreto, o Sergas prevé ofertar un total de 129 prazas para a formación de médicos de familia, é dicir, 24 postos máis que en 2018, o que supón un incremento do 22,8%. Con respecto a pediatría, a sanidade galega expón ofrecer 27 prazas. Esta cantidade aumentaría nun 35% a do ano anterior, con sete postos máis. "As prazas de formación desta especialidade non se incrementaban desde 2013", subliñou o Goberno galego.

Tamén as prazas de enfermería familiar e comunitaria rexistran un aumento. Nestas categorías, o Sergas solicitou a formación de 34 profesionais, isto é case un 62% máis con respecto ao ano anterior.

"Con este aumento de prazas na convocatoria MIR para 2019/2020, o Sergas está a cumprir un dos compromisos do Plan Galego de Atención Primeira recentemente aprobado e que axudarían a paliar a escaseza de facultativos nalgunhas especialidades, das que nin sequera hai profesionais apuntados nas listas de contratación", explicou o Executivo autonómico.