As Urxencias do CHUAC colapsadas pero o SERGAS segue pechando camas no verán
A Comisión de Centro do CHUAC denunciou "unha nova situación de colapso" no servizo de atención a Urxencias do complexo hospitalario, que consideraron "unha consecuencia directa" do peche de camas iniciado este verán.
Pacientes nos corredores do Hospital coruñés
Nun comunicado, advertiron de que este luns se repetiron imaxes doutros anos "de pacientes amontoados nos corredores" en condicións "que atentan contra a intimidade e a dignidade das persoas", todo por insistir en tomar este tipo de medidas a pesar das necesidades asistenciais "constantes" de camas de hospitalización.
A presidenta da Comisión de Centro, María J. Seijo, trasladou que pacientes ingresados tiveron que estar nos corredores do servizo desde o venres esperando o seu traslado a planta, e a propia Xerencia mantivo "bloqueadas as camas pechadas en medicina interna do Abente e Lago".
Esta situación vese agravada, ademais, polo "continuo desmantelamento da capacidade asistencial" de atención primaria, dado que ao non cubrir postos profesionais demóranse as citas e os pacientes acoden a Urxencias para ser atendidos.
"Esta Comisión esixe á Xerencia medidas urxentes, que se rectifique, inmediatamente o peche de camas nas unidades de hospitalización e mantéñanse dispoñibles todos os recursos para garantir a drenaxe de pacientes do servizo de urxencias ás unidades correspondentes", demandaron.
Escribe o teu comentario