Os narcos non renegan do luxo

A Operación Halia contra o narcotráfico permitiu mostrar que renunciar ao luxo non é unha opción para o narco. Así, durante o operativo incautáronse vehículos e motocicletas de alta gama, numerosos aparellos electrónicos e todo dentro de vivendas onde se facía gala da ostentación por parte dos detidos. 

Tras anos de investigación, os últimos movementos deste grupo de narcos do Salnés e un tiroteo en Vilagarcía, aceleraron o operativo dirixido pola UCO da Garda Civil e no que participaron axencias como Europol e a DEA de Estados Unidos. 
 

Segundo informa narcodiario.com, o patrimonio aflorado tras o operativo foi de 10 millóns de euros en España materializados en vivendas de luxo, vehículos, motocicletas, barcos e a explotación de estancos e viveiros de marisco.

Todo isto indica que a norma de “non ostentación” despois das operacións dos anos 90 e 2000, non calou. A chegada do “diñeiro fácil” é unha tentación demasiado golosa para deixala en compartimentos estancos. Por iso, este diñeiro é mobilizado na compra de elementos como os xa mencionados e tamén é “lavado” mediante a súa introdución en negocios lícitos que normalmente adoitan ser unha pantalla.