"Boa vontade" pero sen acordo na última reunión das ambulancias
A pesar da boa disposición das partes, patronal e sindicatos emprazáronse a un novo encontro o próximo 1 de abril.
A pesar da boa disposición das partes, patronal e sindicatos emprazáronse a un novo encontro o próximo 1 de abril.
O último encontro entre a patronal das ambulancias e os sindicatos finalizou sen alcanzar un acordo que satisfaga ás partes, que seguen na procura por un convenio que rexa ao sector en Galicia ata o ano 2022.
Sen cambios nin avances significativos nas negociacións, as dúas partes emprazáronse ao próximo luns, día 1 de abril, para volver sentar a negociar e ultimar os detalles do convenio, tras o preacordo alcanzado que propiciou a desconvocatoria da folga, que o pasado día 20 de marzo tería que entrar nunha fase de folga indefinida.
ACORDO ECONÓMICO
A desconvocatoria da folga chegou en canto as partes alcanzaron un acordo no aspecto económico, con incrementos salariais progresivos ata 2022, o pago de 500 euros brutos en novembro de 2020, unha terceira paga extra a partir de marzo de 2021 e que os traballadores cobren o salario que perciben durante todo o ano tamén en vacacións.
APARTADOS PENDENTES
Os motivos polos que o acordo non chegou a bo porto nesta última reunión parecen ser os relacionados cos salarios para os contratos en prácticas e o porcentaxe de contratos indefinidos que deben asumir as empresas de ambulancias. Mentres, a patronal está interesada en realizar cambios no referido ás horas de presenza.
Aínda que as posturas están ben definidas nos dous casos, a "boa vontade" dos bloques aviva a esperanza de atopar unha solución ao convenio colectivo, unha demanda que o sector reclamaba desde hai anos. Desde a Federación Galega de Ambulancias (FEGAM) sinalan que o acordo está próximo, polo que abril pode traer consigo o anuncio dun acordo definitivo.
Escribe o teu comentario