Ramón Chao, escritor e pai de Manu Chao, falece aos 82 anos

O escritor e xornalista Ramón Chao faleceu o pasado domingo en Barcelona aos 82 anos de idade. Nacido en Vilalba (Lugo) en 1935, desenvolveu gran parte da súa vida en Francia, onde chegou na década dos 60 para comezar a súa carreira na radio.

Pai dos músicos Manu e Antoine Chao --fundadores do grupo Mano Negra-- e irmán do teólogo e escritor Xosé Chao Rego; Ramón Chao traballou en Radio France, emisora na que foi nomeado en 1968 xefe do servizo cultural en español e portugués.

Unha década máis tarde comezou tamén a dirixir todas as emisións neses idiomas de Radio France. A pesar de establecerse no país galo, Ramón Chao mantivo o contacto con España e Galicia e, mesmo, realizou emisións en lingua galega, prohibidas naquel momento polo ditador Francisco Franco.

Ramón Chao foi colaborador da revista Triunfo e do mensual Le Monde Diplomatique, que dirixe Ignacio Ramonet. En 1991 foi nomeado Caballero das Artes e as Letras polo Goberno francés. Entre a súa bibliografía figuran unha vintena de obras entre as que destacan 'Prisciliano de Compostela' ou 'A paixón da Bela Otero'.

O Colexio de Xornalistas expresou o seu pesar pola perda do xornalista lucense a través dun comunicado no que trasladan "o agarimo de toda a profesión" á familia e amigos de Chao.

O alcalde de Santiago, Martiño Noriega, e a portavoz nacional do BNG, Ana Pontón, tamén mostraron as súas condolencias a través das redes sociais polo falecemento.