Orange impulsa na Coruña unha plataforma de IA para pemes
A Cidade dás TIC da Coruña acollerá o desenvolvemento de IA4B, unha plataforma de intelixencia artificial promovida por Orange, parte do mesmo grupo que a marca galega R, para facilitar o acceso a esta tecnoloxía a pequenas e medianas empresas de toda España. O proxecto instalarase no Centro de Servizos Avanzados (CSA), concibido como un espazo compartido para empresas e financiado en parte polo IGAPE dentro do programa de Infraestruturas Estratéxicas Abertas.
A iniciativa conta cunha subvención pública superior a 1,3 millóns de euros, integrada nun investimento inicial que alcanza os 3 millóns. O obxectivo é xerar sinerxías entre grandes compañías e pemes, fomentando cadeas de valor que permitan trasladar solucións tecnolóxicas avanzadas ao tecido empresarial de toda España, especialmente ao galego.
Desde a Xunta, a conselleira de Economía e Industria, María Jesús Lorenzana, visitou as instalacións o pasado decembro e destacou o enfoque do proxecto, centrado tanto no desenvolvemento de solucións innovadoras como na súa aplicación directa en empresas galegas.
Un ecosistema con respaldo empresarial
O despregamento de IA4B comezará con máis de 100 casos de uso xa preparados en sectores como agricultura, industria, cultura ou servizos. A previsión é ampliar esta cifra até varios centos nos próximos anos, coa aspiración de alcanzar o milleiro nun prazo de cinco anos.
O proxecto conta co respaldo de múltiples entidades do ecosistema tecnolóxico galego, entre elas clústeres sectoriais e centros de innovación como DIH DATAlife, Gradiant ou o Clúster TIC Galicia, que manifestaron o seu interese en participar nesta iniciativa.
Ademais, o desenvolvemento apoiarase principalmente en empresas galegas, o que podería contribuír ao fortalecemento do emprego cualificado e a cadea de valor tecnolóxica na comunidade.
Despregamento progresivo até 2027
Durante 2026 poranse en marcha os primeiros pilotos e a actividade comercial inicial, con pemes participando en experiencias prácticas xunto a hubs de innovación dixital. Estes ensaios permitirán medir o impacto en produtividade, eficiencia e vendas.
A previsión é que a plataforma estea plenamente operativa en 2027 a nivel estatal, cun catálogo completo de servizos. A longo prazo, o proxecto contempla un investimento total que podería alcanzar os 70 millóns de euros na próxima década.
Desde Orange, o seu responsable en Galicia, Alfredo Ramos, subliñou o potencial de IA4B para automatizar procesos e garantir o cumprimento da normativa europea en protección de datos. Pola súa banda, desde o CSA destácase o papel do centro como motor de proxectos transformadores, en liña coa estratexia de situar a Galicia como referente no ámbito TIC.
Escribe o teu comentario