O lento languidecer do CTAG, "descapitalizado pola Xunta", denuncia CC.OO.

Nunha comunidade como a galega, onde o sector da automoción ten tantísimo peso na economía da comunidade, unha entidade como o Centro Tecnolóxico de Automoción de Galicia (#CTAG) debería ocupar un lugar privilexiado no que a investimentos se refire. Con todo, e con máis de dúas décadas de percorrido, o CTAG atópase nunha situación inédita, agravada polos 23 despedimentos executados en cuestión dun mes e medio e a falta de recursos, tanto humanos como económicos, que pon en xaque a súa viabilidade.

EXPLICACIÓNS Ao PADROADO

Todo iso denúnciao a Federación de Servizos de CC.OO., que manifesta a súa "profunda preocupación" polo que consideran un exemplo de "descapitalización" no centro, acusando a "perda de persoal cualificado, proxectos e recursos".

A última fervenza de despedimentos supón unha gran "perda de capital humano e técnico" e resta competitividade ao CTAG nun momento crucial para a automoción galega. Nese sentido, o sindicato sinala aos responsables, que non son outros que os que integran o seu padroado, conformado por, entre outros, Xunta de Galicia, Grupo Stellantis, Zona Franca de Vigo ou Borgwarner. 

"O padroado permanece inactivo mentres o centro perde recursos e cadro de persoal, o que acelera un proceso de descapitalización que pode pór en risco o seu futuro", denuncia David Casal, secretario xeral da sección sindical de CC.OO., á vez que lembra que o sindicato reclamou en até dúas ocasións unha reunión coa conselleira de Economía, María Jesús Lorenzana. Até agora, o silencio foi a única resposta do Goberno de Galicia. 

AUTORIDADE LABORAL

"É incomprensible a falta de reacción da Xunta, que forma parte do padroado e debería velar pola estabilidade dunha entidade estratéxica para Galicia", censuran. A continuación, sinalan que xa no verán presentaron unha denuncia ante Inspección de Traballo ante o temor de que os despedimentos respondan a "un ERE encuberto". A autoridade laboral abriu actuacións e reclama á empresa documentos que apoien as medidas adoptadas, un feito que reciben con entusiasmo desde CC.OO. ao interpretar que isto pode arroxar luz sobre a estratexia do CTAG.

"O CTAG é un centro estratéxico para Galicia. Non podemos permitir que a descapitalización e a inacción das institucións poñan en risco o seu futuro. CCOO seguirá defendendo o cadro de persoal con firmeza, responsabilidade e transparencia", razoan.