Ryanair pecha en Asturias, un aeroporto usado por moitos viaxeiros de Lugo

A decisión inclúe o cesamento completo de operacións no Aeroporto de Asturias, con conexións cara a Roma, Bruxelas e Düsseldorf moi utilizadas por viaxeiros galegos, especialmente lucenses, sobre todo da Mariña. A supresión destas rutas dificultará os desprazamentos internacionais desde o noroeste peninsular e aumentará a dependencia doutras compañías e dos aeroportos de Santiago e A Coruña.

O anunciado onte súmase á redución de voos que a compañía xa indicou fai unhas semans, coa cancelación total das súas rutas desde o Aeroporto de Vigo-Peinador e unha drástica diminución en Santiago de Compostela, onde ademais pechará a súa base operativa.

Un axuste que se concentra en aeroportos rexionais

Ryanair non publicou a lista completa de aeroportos afectados polo novo recorte, aínda que en paralelo anunciou que reforzará a súa presenza en Madrid, Barcelona e Palma de Mallorca con 600.000 asentos adicionais, reorientando así parte da súa capacidade cara a destinos de gran demanda turística. Este movemento confirma que os aeroportos rexionais son os máis castigados pola estratexia da compañía e que o mercado periférico queda debilitado en favor dos grandes hubs.

Desde Ryanair insisten en responsabilizar ao Goberno español e a Aena deste axuste. Sinalan como motivo principal as taxas aeroportuarias que, segundo a compañía, penalizan o crecemento en rexións menos saturadas de tráfico aéreo.  Michael Ou’Leary, conselleiro delegado de Ryanair, acusa o Goberno e a Aena de “prexudicar o turismo e o emprego” con aumentos tarifarios que cualifica de inxustificados, lembrando que para 2026 as taxas aeroportuarias subirán ao redor dun 7%, o maior incremento en máis de dez anos. Segundo a súa versión, este encarecemento dificulta manter voos en aeroportos con menor ocupación.

No entanto,  a subida equivale só a uns céntimos por billete, unha cantidade que non compromete a elevada rendibilidade da empresa, aínda que mantén a acusación de que esta é unha política contraria ao desenvolvemento do tráfico rexional. Pola súa banda, Javier Marín, vicepresidente executivo de Aena, rexeitou os argumentos de Ryanair, defendendo que as tarifas en España “son moi competitivas” e que o incremento, duns 30 céntimos por pasaxeiro, non xustifica un repregamento tan agresivo. Marín subliñou que outras aerolíneas están dispostas a cubrir as rutas que abandona Ryanair, o que evidencia que o argumento económico non é determinante.

Unha estratexia internacional de presión

Este conflito non se limita a territorio español. Os recortes en Galicia e o resto de aeroportos rexionais forman parte dunha estratexia que Ryanair despregou tamén noutros países para presionar contra o aumento de taxas. En Estonia, a compañía anunciou que eliminará 110.000 prazas no inverno e outras 230.000 no verán desde o aeroporto de Tallin, cancelando rutas cara a Bérgamo, Pafos, Roma, Venecia e Viena, despois de que as tarifas alí incrementásense un 70%.

O patrón aplicado é similar en toda Europa: concentración en grandes cidades, abandono de aeroportos secundarios e un discurso contra os xestores aeroportuarios, responsabilizándoos dos recortes e da reorganización interna da aerolínea.