Sinalan a dous sospeitosos como autores do gran incendio de Verín

Continúa aberta a investigación para esclarecer a autoría e a orixe do gran incendio que afecta os municipios ourensáns de Verín e Vilardevós e cuxa superficie arrasada se mantén nas 1.360 hectáreas.

Segundo apuntan varios medios, xa foron identificadas dúas persoas como posibles sospeitosos, e investígase se teñen relación co incendio máis grande deste ano en Galicia.

E é que poucas dúbidas hai de que o lume fose intencionado. En rolda de prensa en Santiago, a conselleira de Medio Rural, Ángeles Vázquez, apuntou este venres que "todo indica" a iso, nunha zona na que "non era a primeira vez que había un foco".

Segundo os últimos datos facilitados pola Consellería do Medio Rural, nestes momentos segue desactivado o nivel dous de alerta na parroquia de Vilamaior de Verín xa que non hai perigo para os núcleos de poboación da zona afectada.