Unións Agrarias solicita a Medio Rural unha mesa de xestión de danos polas xeadas

Unións Agrarias (UUAA) demandou á Consellería do Medio Rural a convocatoria "inmediata" dunha mesa de xestión de danos polas xeadas que afectaron a viñedos de catro denominacións de orixe a pasada semana --Valdeorras, Ribeiro, Ribeira Sacra e Monterrei--.

En concreto, reclama unha mesa técnica que aborde un plan de financiamento de urxencia para as perdas provocadas pola xeada nas denominacións de origen, nunha estratexia de actuación que tamén pide que abarque ás producións de castaña de Viana do Bolo e de kiwi na provincia de Pontevedra, entre outras.

Así mesmo, censura a falta de adecuación de pólizas de seguros a Galicia, que impiden unha cobertura "eficaz" nun formato que resulta caro e inoperativo, o cal non se adapta ao minifundio das terras agrarias galegas nin ao modelo de ocupación a tempo parcial para complemento de renda ou de xubilación que teñen unha parte dos agricultores de Galicia.

Por iso, o sindicato agrario lamenta que se produza un risco de exposición en máis dun 80 por cento de explotacións que carecen de seguro.

Así, insta a que se active "xa" un catálogo de compensacións económicas que inclúan axudas de 'minimos' para aquelas explotacións que estean en condicións de recibilas e unha liña de conxelación de pago de intereses financeiros para as que non conten coa posibilidade de recibir axudas vía Unión Europea.

No caso das adegas, tamén considera necesario iniciar unha campaña institucional de promoción de marca nos mercados de referencia para evitar a perda de posicionamento do viño de Galicia pola falta de volume que se prevé pola caída de produción.