Gas Natural denunciará a Colombia pola liquidación e venda da súa filial no país
Electricaribe, intervida a finais do ano pasado, venderase a un operador capaz de asumir os novos investimentos e Gas Natural Fenosa obterá ingresos coa operación unha vez se completen os pagos aos distintos acredores.
Gas Natural Fenosa considera que "non queda outra alternativa" que recorrer aos tribunais internacionais de arbitraxe tras a decisión das autoridades colombianas de liquidar e vender a súa filial Electricaribe.
Con todo, fontes coñecedoras das negociacións entre a empresa e as autoridades colombianas indicaron que o presidente de Gas Natural Fenosa, Isidro Fainé, mantivo unha reunión onte en Bogotá co presidente de Colombia, Juan Manuel Santos, na que ambas as partes acordaron abrir unha liña de diálogo paralela na que se negocie unha nova regulación para Electricaribe a cambio de que a empresa española realice novos investimentos.
As fontes explican que, á marxe destes contactos co Goberno colombiano, están a ultimarse os detalles da denuncia internacional, que se presentará nos próximos días ante o tribunal de arbitraxe dependente do Banco Mundial, o Ciadi.
A compañía española asegura que, "dada esta situación de feitos consumados, a Gas Natural Fenosa non queda outra alternativa que acudir a unha institución internacional para que resolva a situación creada na forma prevista no Acordo de bilateral de protección recíproca de investimentos entre España e Colombia, vía que estivo demorando ata o momento voluntariamente".
Escribe o teu comentario