Volve a tradicional Foliada de Melide encabezada por Tanxugueiras, "un privilexio non ao alcance de todos"

Olaia, Sabela e Aida son, por agora, a única confirmación dun evento que regresa tras dous anos no mellor momento da música tradicional galega en moito tempo.

Mayka Basalo, concelleira de Cultura, atende a Galiciapress como unha das responsables da organización desta cita, na que o Concello de Melide recolle a testemuña da Asociación O Castelo para levala a cabo. 

Música tradicional pero moito máis que iso nunha cita que é xa un símbolo do folclore galego e que volve celebrarse: "En decembro nin sequera podía crer que puidésemos celebrar a edición deste ano". 

Mayka Basalo | Foto: Concello de Melide

A música tradicional vive unha segunda mocidade. É grazas ao traballo e esforzo de moitos grupos que seguen regando as raíces da cultura galega, pero tamén de todas aquelas persoas que apostan por eles. É o caso de Melide, que lonxe de subirse á onda recuperan neste 2022 un evento que é símbolo do municipio e do folclore do país: a gran Foliada de Melide.

A concelleira de Cultura de Melide, Mayka Basalo, celebra que por fin se poida organizar un evento destas características nun ambiente de certa normalidade despois de dous longos anos sen a tradicional foliada. “Imos recuperar a estrutura que utilizaba a Asociación O Castelo, que antes organizaban a foliada, co serán do sábado con grupos da contorna, a marcha gaiteira, os tradicionais cantos de taberna…Todo o que eles facían e que supón a esencia da foliada”, incide a concelleira.

Os pratos fortes da cita serán os concertos do sábado 23 de abril e domingo 24, data na que xa está confirmada a actuación de Tanxugueiras. Como aínda falta máis dun mes para que soen as pandeiretas, no goberno municipal aínda se atopan ultimando os últimos retoques do programa, pero contar con Sabela, Olaia e Aida é un luxo que algúns dos mellores festivais de España non poderán permitirse, a diferenza da gran foliada de Melide.

Ter ás Tanxugueiras no cartel di moito do prestixio da festa e do seu peso dentro do folclore galego, revitalizada con esta nova corrente do “tradi”. “Ter ás Tanxugueiras é un tema que viña xa de lonxe, pero pola pandemia tivemos a foliada, tal e como a coñecemos, moito tempo parada. Levabamos dous anos esperando, pero xa falaramos con elas e coincidiu xusto no momento do seu boom a nivel nacional”, recoñece Basalo, á vez que celebra “o privilexio” de poder contar con elas.

“É algo que non está ao alcance de todos, especialmente porque non quedarán moitas datas libres”, apostila. Con todo, os que se acheguen a Melide eses días atoparán moito máis que música. “Contaremos con animación nas rúas, obradoiros de baile, a mostra de artesanía, actuacións infantís, xogos populares, a presentación dun libro… Vai ser moi variado, pero ao redor da música tradicional e a nosa cultura”, destaca.

PENDENTES DAS RESTRICIÓNS DE ABRIL

Desde o Concello admiten que programar un evento así non foi sinxelo e aínda falta por perfilar algúns aspectos, en función de como mellore a emerxencia sanitaria, o que poderá abrir máis ou menos a man en canto ao número de asistentes aos concertos, aforos, etc.

“Aínda temos cousas no aire. En decembro nin sequera podía crer que puidésemos celebrar a edición deste ano visto como estaba todo. Seguimos moi atentos ás novas normas, porque non sabemos que restricións pode haber en abril, pero espero que nos atopemos xa na senda adecuada”, indica a concelleira de Adiante Melide, que con todo puntualiza que esta inseguridade “afecta a todos os concellos, porque todos pasámolo bastante mal e é moi difícil programar e traballar así”.

O que si pode avanzar é a localización, que non poderá celebrarse na Praza das Coles, polas obras na rúa principal que obrigan a buscar unha nova localización á foliada. Trátase dun cambio “provisional” polas circunstancias e que contará cun aforo para os concertos aínda por determinar.

Os TURISTAS VOLVERÁN A ENCHER MELIDE

O que resulta evidente é que todos os veciños teñen ganas de festa, así como os hostaleiros, que despois duns meses difíciles ven na foliada un salvavidas para moitos negocios. Esta bocanada de aire fresco "entusiasmou" a todo o sector.

“A foliada congrega a moita xente que vén de distintos puntos de Galicia e mesmo de fóra, que nos visitan e aproveitan para pasar a fin de semana. Creo que vai ser un aliciente e un respiro, porque todos estaban moi atentos e preguntándonos se este ano por fin ía haber foliada de novo. Hai moita euforia contida, pero contamos que se todo segue así se encha o pobo como en anos anteriores”.

Un turismo que en Melide esperan cos brazos abertos e que xogará un papel importantísimo neste 2022, no que a influencia do Camiño de Santiago e o Xacobeo serán determinantes para a recuperación económica da zona. Con este panorama, as perspectivas turísticas son prometedoras, pero desde o Concello, aínda que admiten que están a facer os deberes, resístense a soltar peza.

“Non podo adiantar nada. Temos moitos borradores, pero programamos para un verán cultural, tamén para o San Roque, porque contamos co regreso das festas de verán. Pero non podo dicir nada máis porque amolaría a sorpresa”, comenta Basalo. Toca esperar e abrir boca cunha gran foliada.