Volven os macrocribados: 8.000 convocados en Vigo por SMS para unha PCR de covid-19
A área Sanitaria de Vigo citará a unhas 8.000 persoas esta semana a realizar unha proba PCR para detectar posibles casos de Covid-19, a través dunha convocatoria que empezará con SMS a menores de 50 anos dos centros de saúde da cidade olívica.
Segundo os últimos datos da Xunta por municipios, Vigo está en nivel de risco alto cunha incidencia acumulada de entre 75 e 125 positivos por 100.000 vigueses á semana.
A razón de taxas de Vigo é de 1,37; o que quere dicir que na última semana houbo un 37% de positivos máis que na penúltima.
O cómputo de positivos a 7 días en Vigo é de 334, o xoves pasado eran só 185.
Segundo informou esta área sanitaria, deste xeito o Sergas renova a realización de cribados programados á poboación asintomática da área Sanitaria de Vigo.
LOCALIZACIÓN
Esta semana citará a 8.000 persoas para realizarse a PCR no Punto de Atención Móbil (PAM) emprazado nas Avenidas fronte ao Náutico de Vigo.
Deste xeito, esta área sanitaria renova os cribados poboacionais a poboación asintomática. Tamén programou un cribado específico para traballadores do Porto de Vigo.
Escribe o teu comentario