Covid escolas: 349 casos activos, pero funcionan a pleno rendemento sen centros nin aulas pechadas​

A reapertura de todas as aulas prodúcese tras o parón provocado polas vacacións de Semana Santa. O pasado 27 de marzo había nove aulas que permanecían clausuradas. 

Doutra banda, son 349 os casos activos na comunidade educativa, o que significa 97 casos menos desde a última actualización. 

A volta ás aulas tras o parón lectivo de Semana Santa arrinca con 349 casos activos de Covid-19 en centros educativos de Galicia --escolas infantís e ensino non universitario--, o que supón 97 menos que os datos correspondentes á última xornada de clase --actualizados o 27 de marzo--.

Segundo os rexistros actualizados este mércores polas consellerías de Educación e Sanidade, as clases tras a Semana Santa comezan con menos casos activos e sen aulas pechadas --había nove o último día de clase antes do parón lectivo--, nin centros pechados pola Covid-19 --como antes do período festivo--.

Por áreas sanitarias, a de A Coruña mantense co maior número de casos activos, 114, o que supón 64 menos que a última xornada lectiva entes da Semana Santa. O IES Murguía de Arteixo presenta o maior número de contagios, con 10.

Séguelle a área de Vigo, con 103 casos activos --catro máis--, co CPR Plurilingüe Casa da Virxe de Cangas con máis contagios, un total de sete.

Tras elas, colócase a área de Pontevedra e O Salnés, con 54 contagios, o que supón 12 máis que antes das vacacións de Semana Santa. O CIFP A Xunqueira de Pontevedra conta co maior número de casos, cinco.

A área de Santiago e Barbanza rexistra un lixeiro incremento no número de casos ata os 43, o que supón cinco máis, co CPR Plurilingüe La Salle e o IES Antonio Fraguas á cabeza, con catro en cada caso.

Séguelle a área de Ferrol, con 19 casos activos --25 menos--, co centro CPR Tirso de Molina con cinco contagios, o que supón 16 menos dos que contaba antes do parón lectivo de Semana Santa.

Con menos casos de Covid-19, oito contagios cada unha, colócanse as áreas de Lugo --distribuídos en sete centros-- e Ourense --en oito centros--.