A maior subida de casos activos desde xaneiro indica que un rebote do covid pode estar preto

Os últimos datos do coronavirus en Galicia son os peores da última semana. Todos os indicadores semanais e bisemanales crecen, aínda que é pronto aínda para falar dun rebote ou outra onda.

Os casos activos aumentan en todas as áreas sanitarias, menos na Coruña. Aumentan sobre todo en Vigo, que o distrito cunha evolución máis preocupante.

Os mércores adoitan ser un día de malos datos, pois a Xunta comunica resultados de probas realizadas o luns, tras a diminución de test de fin de semana. O problema é que os 148 positivos comunicados hoxe son significativamente máis que anteriores mércores (124) e proveñen principalmente  dunha soa área sanitaria, Vigo.

A nivel autonómico a incidencia acumulada semanal crece de 30,9 a 31,8 diagnósticos por 100.000 galegos. É unha subida, pero non o peor rexistro da chaira da que goza Galicia desde principios de mes, que está a oscilar estre 34 e 29.

Abrindo o plano a dúas semanas, tamén hai un ascenso da incidencia acumulada, de 62,7 a 63,6. Do mesmo xeito que na incidencia semanal, a tendencia xeral deste indicador é un chairo con leves vaivéns desde mediados de mes.

Igualmente, a media semanal da taxa de positividade sobe un pouco, de 2,0% a 2,1%. Débese en boa medida ao último dato, un 2,7%; a peor cifra da semana.

EVOLUCIÓN DO CAMBIO DE CASOS ACTIVOS

O número de novos diagnósticos gaña hoxe, e por bastante, a súa batalla diaria contra o número de altas. O resultado é que os casos activos crecen un 2%, que é a maior subida desde o 28 de xaneiro. En termos absolutos, significa un aumento de 47 casos, a peor cifra desde o 1 de febreiro.

Fixándonos na media móbil semanal, que é o indicador máis representativo, vemos que pasa do -1,1 ao -0,5%. É dicir, se mañá damos outro paso como o de hoxe,a media semanal poñerase en valores superiores a cero. 

CONCLUSIÓNS

Con todas estas cifras á nosa disposición, podemos inferir que:

• En canto a media semanal da porcentaxe de cambio de casos activos pase a algarismos positivos, iso significará que, desde a perspectiva a sete días, o SERGAS volve ter que lidar cada día con máis e máis casos activos. Entón é cando poderemos dicir que Galicia sofre un rebote e, oxalá que non, pode estar a se dirixir cara á cuarta onda.
• Por agora Galicia aguanta na súa planicie de positivos, que goza desde principios de mes. A oscilación hoxe é á alza, pero non ten por que ser máis que outro entre os leves vaivéns deste período de relativa calma.
• A fronte máis preocupante agora na batalla contra a pandemia é Vigo. Os casos activos nese distrito sanitario levan subindo desde principio de mes e hoxe dan outro salto considerable. De feito, sen Vigo, Galicia aínda conservaría certa tendencia á baixa.
• Cando golpeará a cuarta onda en Galicia e con que virulencia? É imposible prevelo, pero a evolución do conxunto de España pode darnos unha idea aproximada. Ata o de agora, a curva de incidencia acumulada bisemanal de Galicia segue o rebufo da media española, cunha semana de atraso aproximadamente e en valores visiblemente máis baixos. Un diferencial que se está acrecentando por agora:

ÚLTIMOS DATOS POR ÁREAS

Vigo achega 59 dos 148 novos diagnósticos de Galicia hoxe. É case o 40%, moito máis do que lle correspondería en proporción á súa poboación. Os 21 de Pontevedra tamén son unha cifra considerable en función ao peso desta área.

Iso si, unha eventual cuarta onda chegará cun SERGAS con bastante marxe de manobra nos hospitais. Por exemplo, en Vigo só quedan cinco enfermos críticos. No resto de áreas quedan unicamente dúas, salvo na Coruña que aínda ten 15 persoas en UCI. Máis datos por áreas sanitarias e municipios nuns minutos en Galiciapress.