Toca fondo o descenso do coronavirus en Galicia tras a terceira onda, mostran as medias semanais

As últimas cifras do Covid-19 confirman que a melloría tocou fondo ou está a piques de facelo, polo menos desde un punto de vista semanal. A media semanal de positivos leva unha semana practicamente estancada, cunha ligerísima tendencia á baixa, e a media semanal da taxa de positividade xa está rebotando un pouco.

Todo isto a pesar de que o último número de positivos confirmados por PCR é esperanzador, 94. É a primeira vez desde o domingo pasado que baixa de 100.

O descenso da incidencia acumulada semanal extinguiuse case por completo. Hoxe baixa de 33,5 a 32,9 e empezou a semana en 35,2.  É dicir, caeu menos de tres puntos unha semana. A este ritmo é case imposible que descenda a 25, que é o límite entre o risco medio actual e o risco baixo no semáforo de alertas estatal.

Abrindo o plano a 14 días, o descenso aínda é significativo. Empezamos a semana en 84 positivos por cada 100.000 galegos e acabámola en 67. Con todo, visto o comportamento da incidencia acumulada semanal, é moi improbable que a incidencia acumulada a 14 días alcance os 50 que nos permitirían entrar en nivel baixo.

Outro indicador semanal, a media móbil a sete días da taxa de positividade, xa presenta unha lixeira tendencia á alza. Empezamos a semana cun 1,8% de test positivos e acabámola co 2%, tras o 1,5%. É un cambio de tendencia mínimo, pero significativo polo que supón de interrupción dunha melloría que duraba máis dun mes.

EVOLUCIÓN DA PORCENTAXE DE CAMBIO DE CASOS ACTIVOS 

A derivada da curva de infectado é quizais o mellor indicador para medir o ritmo de ascenso ou descenso da enfermidade. Seguimos en descenso, pero ese descenso é cada vez menos acusado. Empezamos a semana cunha media móbil a sete días do -5,1% e acabámola no -4,1% de onte.

En termos absolutos isto tradúcese en 105 infectados menos desde onte, o que deixa o total en 2.749 casos activos. 

CONCLUSIÓNS

Con todas estas cifras sobre a mesa, podemos concluír que:

• A retirada da terceira onda en Galicia terminou ou o punto de inflexión está moi próximo , polo menos desde un punto de vista semanal. Desde o punto de vista a 14 días hai un estamos en descenso.
• O ritmo dese descenso a nivel semanal é xa tán débil que parece moi complicado que logremos baixar as incidencias semanais outro banzo no sémaforo de alertas.
• A perda de brío da melloría, que empezou a finais de febreiro, acelerou notablemente esta semana.
• De feito, cada vez son máis frecuentes repuntes a nivel de cidade e mesmo de casos activos a nivel de área sanitaria, caso de Santiago onte e de Ferrol hoxe.
• Por agora, eses repuntes locais son pequenos e temporais, adóitanse corrixir ao día seguinte. Non podemos dicir que a nivel galego esteamos nunha fase de rebote aínda, si de planicie. Con todo, dada a virulencia da cepa británica, a situación non parece moi propicia para un alivio importante das restricións vixentes.

ÚLTIMOS DATOS POR ÁREAS

A Coruña é o distrito sanitario que día tras día lidera a clasificación de novos diagnósticos. Iso si, a cifra de onte é moi modesta, 33.  Ningunha área chega aos 50 positivos e só na Coruña e Vigo quedan máis de 10 enfermos críticos.

Hai que ter que os datos de hoxe proveñen do venres, día que empezou o macrocribado na capital provincial. Con todo, ese cribado é mediante proba de saliva, polo que é probable que as mostras positivas detectadas o venres aínda non fosen ratificadas mediante PCR. É dicir, é probable que os datos da Coruña cidade empeoren a principios dela próxima semana. Máis análise a nivel municipal e de área sanitaria nuns minutos en Galiciapress.