“Non podo estar outra semana sen traballar”, denuncia un boirense en espera da PCR desde hai máis de 7 días

Unha parella de boirenses denuncia en Galiciapress a suposta inacción do SERGAS despois de permanecer en corentena máis dunha semana á espera de que lles realicen unha proba PCR a el, tras acudir a Urxencias o pasado luns. Desde o SERGAS rebátese que case todos as PCR fanse en 24 ou como máximo en 48 horas, salvo problemas puntuais, que poden deberse a uns datos de contacto incorrectos, polo que insisten na importancia en revisar os que figuran asociados á tarxeta sanitaria.

Os dous mozos sufriron os síntomas propios dunha gastroenterite, pero ao ser estes compatibles coa sintomatoloxía que podería estar relacionada coa COVID-19 foron chamados a gardar corentena e realizar unha proba PCR tal e como indica o protocolo actual. Un test que aínda non foi realizado no caso do home, quen, como a súa parella, permanece illado a pesar de superar os síntomas hai xa varios días.

A pesar de asistir ao Servizo de Urxencias do centro de saúde de Boiro o pasado luns 7 de setembro, só un dos dous mozos foi sometido á proba PCR. “O mércores fixéronme a proba e o xoves xa tiña os resultados, pero el, que foi o primeiro en atoparse mal, leva desde o luns esperando”, lamenta a afectada.

Neste tempo foron varios os intentos da parella de poñerse en contacto co servizo de saúde para que lles ofrecese unha solución ao seu problema. A explicación que lles trasladaron desde o SERGAS pola tardanza en facer a proba é un problema de coordinación cos números de teléfono dos afectados. 

“Andan ás voltas con nós. Déronnos un teléfono e estivemos toda a semana chamando, pero ou ben nos colgan ou non nolo collen”, relata a moza boirense, que a pesar de que a súa proba PCR deu negativa viuse obrigada a confinarse xunto á súa parella, coa que reside, xa que ao non realizar a proba esta última non podían saber con certeza se puideron contraer ou non a enfermidade. Con todo, recalcan, ningún dos dous reviste xa síntomas despois de máis dunha semana e que sentían un gran sentimento de "impotencia" ao non obter unha resposta do SERGAS.

PCR UNHA SEMANA DESPOIS

O pasado luns 14 de setembro, cando xa se cumpriu unha semana da súa visita a urxencias e despois de isistir segundo a súa versión, o jóven recibiu a citación para realizar a proba no Hospital do Barbanza, na carpa habilitada para facer as PCR. Con todo, e aínda que o chamaron para comparecer inmediatamente no lugar, os jovenes relatan que na zona dos test non había ninguén para atendelos e que finalmente lles deron cita para outra hora. Os resultados da proba arroxaron o martes que a PCR era negativa. 

Carpa do Hospital do Barbanza onde se realizan as PCR, sen persoal para atender aos usuarios

"NON É O HABITUAL"

Desde a área sanitaria de Santiago de Compostela - Barbanza comentan que este é un caso moi pouco habitual e que as probas PCR realízanse "en 24 ou, como moito, 48 horas". "As probas PCR neste caso fanse no 'Covid-auto' e só hai atrasos en casos moi illados".

No referido á suposta desatención que denuncian os afectados, que advirten que no número de teléfono que lles facilitaron desde o SERGAS non os atendeu ninguén, o propio SERGAS admite que isto pode deberse ao alto número de chamadas que se rexistraron nos últimos días de xente buscando información ou realizando consultas de diverso tipo. Isto vén provocado, en gran medida, polo crivado que se realizou nos centros escolares.

"Está a chamar moita máis xente do normal en horarios fóra dos habituais aos centros de saúde, o que provocou algúns problemas", comentan. Con todo, subliñan que se trata dun feito "puntual" que vén dos test masivos realizados aos profesionais de a educación galega. Un crivado que, doutra banda, xa finalizou, polo que a normalidade neste sentido debería recuperarse nos próximos días.

Doutra banda, no SERGAS insisten en que, a pesar de que algunhas PCR poidan ser máis "urxente" que outras segundo a situación dos afectados, a importancia da quen se debe facer o test antes responde exclusivamente o "criterio clínico". "É o médico de cabeceira o que ten que dar a cita a cada persoa, non podemos ir pasando o recado entre familias ou amigos aproveitando que chamamos a un", agregan desde o SERGAS. 

No que si insisten desde o Servizo Galego de Saúde é que, aínda que son "casos moi reducidos", están a rexistrarse algúns problemas, como neste episodio, no que os profesionais sanitarios están a atopar dificultades para localizar a algunhas das persoas que teñen a proba pendente.

"Para que che chamen tes que ter ben actualizados os teus datos, porque se están dando casos de xente á que é imposible localizar por este motivo: porque cambian de número ou de dirección e non actualizan os seus datos, porque o número que deron no seu momento é antigo ou incorrecto... É responsabilidade de cada un facilitar ben os datos", sinalan desde o SERGAS. 

Nese sentido fan un chamamento á poboación, especialmente á poboación nova, para que comprobe se os seus datos na tarxeta sanitaria son correctos  e, en caso contrario, que actualicen canto antes os mesmos para facilitar o labor dos servizos de saúde. "É nesta serie de casos cando se producen os atrasos", conclúen desde o SERGAS.

UNHA SEMANA TOTALMENTE PARADO

Con todo, o maior inconveniente de estar confinados é o feito de que o mozo, que é o único dos dous con emprego, atópase de baixa a pesar de atoparse ben fisicamente. Aínda co resutlado do test negativo na man o protocolo indica que debe cumprir os 14 días de corentena e non poden darlle a alta médica por ter síntomas.

“Ten que pasarse un mes enteiro na casa ou que? Ao final vai perder o traballo e é o que nos faltaba, porque dos dous só está a traballar el”, comenta a afectada. A súa parella comparte o mesmo temor, pero sobre todo está inquieto porque a súa situación económica non lle permite ausentarse moitos días máis do seu posto de traballo: “Non podo estar outra semana máis sen traballar”. 

Con todo, nas últimas horas o propio ministro de Sanidade, Salvador Illa, comentou que, a pesar de que algúns países como Francia decidiron rebaixar o tempo de corentena a unha semana, en España ese debate non ten lugar ata que non existan evidencias científicas que apoien a posibilidade de reducir o tempo de illamento. Por iso, e seguindo os protocolos habituais, o illamento segue fixado nas dúas semanas.