Tres infectados con coronavirus máis en Beariz (Ourense) vinculados a unha moza de México hospitalizada
Dous dos infectados tamén son importados e con nexo familiar coa moza hospitalizada
Son catro xa os positivos confirmados nun rebrote que parece provir de casos importados de México. Estarían vinculados á numerosa diáspora ourensá no país americano, que adoita retornar para as vacacións estivais.
O seguimento dun caso importado de COVID-19 nunha moza procedente de México, ingresada no Hospital Universitario de Ourense, detectou tres positivos máis no municipio ourensán de Beariz, dous deles importados tamén.
DOUS POSITIVOS MÁIS PROCEDENTES DE MÉXICO
Os tres positivos máis detectados confirmados por PCR en Beariz corresponden dous deles a casos "importados", puntualizaron as mesmas fontes, "e con nexo familiar con esta".Todos eles, destacaron as mesmas fontes da área sanitaria nun comunicado de prensa, permanecen "en illamento e seguimento domiciliario".
Debido a estes novos contagios, subliñaron as mesmas fontes, ampliouse "o círculo de contactos", co obxectivo de "limitar o risco de novas infeccións" e "tomado medidas preventivas indicadas nos protocolos aplicables nesta situación", sinalaron.
VIXILANCIA
Por parte da área sanitaria ourensá ínstase á poboación para "manter a vixilancia" e "seguir cumprindo as instrucións das autoridades sanitarias" relativas a hixiene de mans frecuente, emprego de máscara e distancia de seguridade.
Ademais, ante calquera síntoma "compatible coa infección" pide que queden en casa "e evitar contacto con outras persoas ata recibir instrucións desde os seus centros de saúde ou PAC".
Escribe o teu comentario