Cuarto repunte leve na Coruña en dez días, a pesar de que Galicia reduce a súa gráfica desde onte, indica o SERGAS

Os datos do Servizo Galego de Saúde evidencian a delicada situación que atravesa a área herculina. Aínda que o número de casos activos non é alarmante, o feito de que a zona conte con máis casos hoxe que o 10 de xuño resulta significativo.

As demais áreas galegas non sofren apenas variacións, con varias delas atravesando un longo período de letargo nas súas cifras. Nese aspecto, o dato máis relevante volve arroxar a área de Ferrol, que ofrece unha nova xornada sen cambios, a novena consecutiva. 

A Coruña suma un caso máis desde onte e sitúase nos 110 casos activos. Este é o cuarto repunte da área coruñesa, que desde fai dez días deu varios botes na súa gráfica, intercalando leves repuntes con baixadas pouco pronunciadas e fases de hibernación. Neste tempo só ha visto reducidos os seus algarismos nunha ocasión. 

Doutra banda, as áreas que hoxe si perden casos son Santiago de Compostela e Pontevedra, cun caso menos nas últimas 24 horas en cada unha. A área da capital suma a súa segunda xornada consecutiva reflectindo descensos, mentres que a área da cidade do Lérez volve perder casos despois de sumar dous no día de onte. 

En cambio, máis da metade das áreas galegas non sofren cambios. Como Ferrol, 

Vigo leva días instalada nos 141 casos. Ourense e Lugo, aínda que onte viron minguadas as súas cifras, hoxe non rexistran cambios. 

DESCENSO LENTO

A pesar de que hoxe Galicia perde casos activos -un concretamente- a situación na comunidade é de descenso lento. O máis preocupante é que a media móbil a sete días da porcentaxe de variación diaria está a achegarse perigosamente a valores positivos. O -0,8% actual é a segunda redución máis lenta desde principios de maio, só superado polo -0,6%  de onte.

A que se debe esta tendencia? En primeiro lugar, a que siguen aparecendo positivos. Todos os días o Ministerio inclúe no seu informe diario un ou dous positivos por PCR en Galicia. Son persoas que teñen o virus e que non o superaron e son contaxiosas.

A isto hai que engadirlle os positivos por anticorpos, que o SERGAS segue atopando entre certos colectivos, como traballadores sanitarios ou pacientes aos que se lle fai PCR antes de operalos. 

En principio, o que máis nos debe preocupar son os positivos por PCR, que proban que a enfermidade segue viva en Galicia. Están a aumentar os contagios? Por agora non, polo menos segundo os datos que o Ministerio publica coas cifras que lle manda a Xunta. 

Segundo os datos de as notas de prensa do SERGAS, este sábado 20 de xuño o número de casos activos de coronavirus en Galicia é de 340, dos cales 110 son da área da Coruña, 17 de Lugo, 24 de Ourense, 8 de Pontevedra, 141 da área de Vigo, 28 de Santiago e 12 de Ferrol.