Piden cinco anos a directivos por falsificar firma para vender preferentes a anciá

)

A Sección Segunda da Audiencia Provincial de Lugo xulgará este xoves, 4 de xuño, ao director e á directora dunha sucursal de Carballedo (Lugo) --por entón Caixa Galicia-- por estafar 110.000 euros a unha anciá de 77 anos en 2009 coa venda de preferentes.

Segundo o escrito de Fiscalía, acúsase a estas dúas persoas de estafa e falsidade en documento mercantil ao xestionar a adquisición desta clienta sen coñecementos financeiros, "aproveitando" o "clima de confianza" coa prexudicada.

Os directivos da sucursal, segundo a acusación, configuraron un contrato no que se reflectía que a clienta adquiría os valores con coñecemento das condicións e os riscos reais da operación.

Para iso, segundo o fiscal, simularon a súa intervención, facéndoa constar sen o seu consentimento en concepto de ordenante e estampando catro asinas que imitaban a súa, "a propósito da súa falsidade".

Ambos, "postos de común acordo e inspirados polo ánimo de obter un lucro para a entidade Caixa Galicia", ofreceron a través de conversacións telefónicas á muller a posibilidade de colocar parte dos seus aforros nunha conta da entidade para "así obter un interese maior do que estaba a percibir". Todo iso, "ocultando o risco que conlevaba a operación"

No escrito de acusación, figura a petición de que os acusados indemnicen á prexudicada con 110.000 euros "coa responsabilidade civil subsidiaria da entidade Abanca", entidade resultante de Caixa Galicia tras os procesos que seguiu a entidade financeira. O caso procede do Xulgado de Instrución número 1 de Chantada.