Coronavirus: Sánchez confirma o peche de todo o país e advirte que "dispoñeremos da actuación das forzas armadas, o exército xa está listo"

Pedro Sánchez confirmou o Estado de Alarma. "Non nos vai tremer a man", prometeu o socialista. "As medidas que imos adoptar van ser drásticas", recoñeceu o presidente de España. Fíxoo nunha intervención en rolda de prensa ao fío das 9 da noite, sete horas máis tarde do anunciado, no medio de informacións de tensións na coalición con Podemos. Sobre as eleccións galegas e vascas, delega a decisión nos partidos políticos destas autonomías. 

O presidente xustificou as diferentes medidas adoptadas ata o de agora polo escenario cambiante.

Unha das primeiras medidas anunciadas é que todas as policías quedan baixo o mando do Ministro do Interior.

Cando sexa necesario, "dispoñeremos da actuación das forzas armadas, o exército xa está listo para iso".

Só se puiden saír para:

• comprar alimentos, produtos farmacéuticos e outros produtos esenciais
• asistencia médica a centros sanitarios
• desprazamento ao lugar de traballo
• retorno ao lugar de residencia habitual
• coidado de menores ou persoas vulnerables
• acudir aos bancos e a outros servizos financeiros

A circulación pola vía pública deberá ser individual, salvo discapacitados. A prohibición de circular pola rúa "é desde hoxe", non desde o luns, aclarou Sánchez.

Queda suspendida toda actividade comercial comerciante polo miúdo, salvo os de primeira necesidade e equipos de telefonía e outros servizos como barberías. 

Iso si, a permanencia deberá ser a estritamente necesaria, cunha distancia mínima de polo menos un metro.

O Ministro de Sanidade poderá intervir e ocupar temporalmente medios sanitarios privados e impoñer traballos temporalmente.

Sánchez chamou á unidade e confirmou que mañá dialogará cos presidentes autonómicos. 

Pediu "colaboración e unión" ás autonomías.

"Coordinarnos non é unha opción, é unha obrigación para saír vitoriosa desta emerxencia sanitaria", concluíu.

Animou aos cidadáns para parar os bulos e as fake news.

O presidente concluíu pedindo especial cautela coas persoas maiores e agradecendo o labor de sanitarios, forzas de seguridade, forzas armadas, investigadores e outros colectivos.

"Esta é unha batalla que imos gañar, non hai discusión, o que está en xogo será o prezo para pagar", concluíu.

ELECCIÓNS GALEGAS

Na quenda de preguntas, sobre a suspensión dos comicios autonómicos, Sánchez dixo que onte mesmo falou co presidente da Xunta e o lehendakari vasco e lembrou que ambos quedaron con diferentes grupos políticos autonómicos este luns. "Quedamos á espera da decisión que tomen os diferentes grupos políticos",  dixo o presidente, especificahndo iso si que "a opinión do Goberno é que é pouco razoable" organizar as eleccións o 5 de abril. 

É dicir, que a suspensión das eleccións depende dos partidos galegos o luns, pero Sánchez quere aprazalas.

POR QUE FOI PABLO IGLESIAS Ao CONSELLO DE MINISTROS?

Sobre a presenza de Pablo Iglesias, Pedro Sánchez lembrou que deu negativo nas probas. O líder de Podemos anunciara a súa corentena cando a súa parella a ministra Irene Monterio deu positivo en COVID-19.

Desde fontes próximas Podemos alegouse esta tarde a Galiciapress que foi Sánchez quen pediu a presenza do vicepresidente no Consello de Ministros, debido a que a súa ausencia podería ter consecuencias legais nas decisións. 

As mesmas fontes recoñeceron que as tensións na coalición motivaron que o Consello de Ministros Extraordinario superase as seis horas. Os desacordos parecen centrarse na materia económica, con Unidas Podemos reclamando medidas que garantan xa os ingresos dos asalariados, moitos dos cales perderán o seu emprego -aínda que sexa temporalmente- ante o lóxico pecho de comerciosal por menor  e outros negocios abertos ao público.

O enorme atraso suscitou esta tarde nerviosismo entre unha cidadanía pendente durante horas de que medidas concretas ían regular a súa vida durante o Estado de Alarma. Sánchez pediu desculpas pola espera, pero evitou penetrarse nas diferenzas con Iglesias. Tamén esquivou concretar a súa estimación de canto pode durar a crise do coronavirus.