​O Colexio de Xornalistas de Galicia esixe "explicacións" á Xunta polo episodio de veto aos medios

Desde o colectivo sinalan que o Goberno autonómico debe "aclarar" este cambio de criterio polo que se impediu aos medios gravar unha entrega de firmas.

Os medios censurados en San Caetano

Cando onte un axente da Policía Nacional impediu aos medios de comunicación filmar a entrega dunha carta reivindicativa dos sindicatos de Educación no Rexistro e ademais prohibiu aos xornalistas alí congregados que tomase declaracións aos sindicalistas no recinto de San Caetano, o episodio tornouse nun claro veto aos medios por parte da administración galega.

Aínda que desde a Xunta escudáronse en que a medida respondía á Lei de Protección de Datos, o Colexio Profesional de Xornalistas de Galicia pide máis explicacións respecto diso. "O Colexio de Xornalistas solicita á Xunta de Galicia que aclare a que obedece o cambio de criterio polo que se impediu onte que os medios de comunicación gravasen unha entrega de firmas recollidas polos sindicatos no Rexistro de San Caetano en Santiago de Compostela", publicou o organismo nas súas redes sociais.

DESBLOQUEAR A NEGOCIACIÓN

O acontecemento vetado pola Xunta foi a entrega dunha carta dirixida ao presidente Feijóo por parte dos portavoces de CIG-Ensino, FeSP-UXT, ANPE, CC.OO Ensino, STEG e CSIF co fin de desbloquear a negociación sobre a recuperación dos dereitos e condicións do profesorado recortados durante a crise económica. Os propios sindicatos, afectados pola medida, sinalaron que era un caso claro de "censura" aos medios e á liberdade de información.

Onte Galiciapress desarmou a versión deslizada desde Vicepresidencia, que esgrimía que "non se pode -nin agora nin nunca- tomar imaxes dentro do Complexo Administrativo de San Caetano sen previa autorización", cando existen centenares de exemplos onde se pode ver a representantes sindicais dando declaración aos medios dentro do edificio da Xunta.