Aparece morto en Verín o home desaparecido en Oímbra

A súa filla alertara que o chamara para anunciarlle que ía suicidarse. O seu cadáver non presenta síntomas aparentes de violencia.

O cidadán portugués de 62 anos de idade desaparecido desde o martes 31 de decembro na zona de Oímbra, na provincia de Ourense, foi localizado falecido na tarde deste xoves.

Segundo informaron a Europa Press fontes do dispositivo de rastrexo, o cadáver foi achado á beira do seu coche, nas proximidades da depuradora no termo municipal de Verín.

ATOPOUNO PROTECCIÓN CIVIL

Foron efectivos de Protección Civil de Verín, que participaron na procura xunto á Garda Civil e brigadas de Medio Rural do distrito da zona, os que acharon o corpo e avisaron ao Instituto Armado.

A procura centrouse no pobo de Oímbra e na zona de monte dos arredores despois de que a familia do desaparecido denunciase a súa ausencia este xoves pola mañá.