Sanidade asina dous convenios de colaboración destinados ao "intercambio e mellora da formación técnica e científica"

A Consellería de Sanidade asinou esta semana dous convenios de colaboración coa Casa de Galicia de Uruguai e coa Asociación Española Primeira de Socorros Mutuos de Montevideo, destinados ao "intercambio e mellora da formación técnica e científica".

O obxectivo destes acordos é a "posta en marcha dun programa de colaboración en materia de asistencia técnica e intercambio de coñecemento e formación de profesionais", segundo explicou a Xunta mediante un comunicado.

Este acordo tamén busca o desenvolvemento de actividades noutras áreas e disciplinas, como programas de mellora da calidade de estándares asistenciais, ou a avaliación e xestión de recursos humanos, entre outros sectores, mediante estancias temporais de persoal que presta servizos en centros asistenciais xestionados polas institucións representadas no acto.

As asociacións comprométense a "facilitar ao persoal designado por cada institución a posibilidade de realizar estancias temporais de formación en centros xestionados polas mesmas en áreas profesionais e de coñecemento" como a práctica médica, terapias innovadoras, farmacia hospitalaria, coidados de enfermería ou prevención de riscos profesionais, entre outras.

INTERCAMBIOS DE COÑECEMENTO
Ademais, as institucións impulsarán "o intercambio de coñecementos no ámbito de medicina", mediante o desenvolvemento e organización de actividades científicas, docentes e de formación en temas específicos con novas tecnoloxías da información e comunicación.

Os convenios foron asinados polo conselleiro de Sanidade, Jesús Vázquez Almuiña; por Alberto Iglesias Rodríguez, presidente da Casa de Galicia en Uruguai; e polo xerente da Asociación Española de Primeira de Socorros Mutuos, Julio Martínez Pérez. Ao acto tamén asistiu o secretario xeral de Emigración, Antonio Rodríguez Miranda.