​Batet, presidenta do Congreso

A socialista Meritxell Batet Lamaña foi elixida presidenta do Congreso na segunda votación celebrada na sesión constitutiva da Cámara, impoñéndose á candidatura da actual titular, Ana Pastor, auspiciada polo PP.

Meritxell Batet, candidata pactada por PSOE e Unidas Podemos, logrou un total de 175 votos, o que implica que sumou tamén apoios de PNV e de formacións minoritarias como Coalición Canaria (CC), o PRC e Compromís.

Ana Pastor, promovida polo PP, quedouse en 125 votos, os do PP máis os de Cidadáns e UPN. Tamén se rexistraron 35 votos en branco, fundamentalmente de Vox e de Junts per Catalunya; e 15 nulos, a opción de ERC e Bildu.

Na primeira votación, a deputada catalá xa se quedou a un voto de ser elixida presidenta ao primeiro intento, pois necesitaba 176 sufraxios e obtivo 175 impoñéndose a Pastor (PP), Sara Giménez (Cidadáns) e Ignacio Gil Lázaro (Vox).

BIOGRAFÍA 

Batet Lamaña milita no PSC desde 2008, forma parte do equipo de Pedro Sánchez desde xullo de 2014, foi a número dous da lista por Madrid coa que o líder do PSOE aspirou por primeira vez á Presidencia do Goberno e foi ministra no Executivo socialista que saíu da moción de censura de 2018.

Nada en Barcelona o 19 de marzo de 1973, Batet é licenciada en Dereito pola Universidade Pompeu Fabra, onde cursou estudos de doutoramento e exerceu de profesora de Dereito Constitucional. 

Entre 2001 e 2004 dirixiu a Fundación Carles Pi i Sunyer, un espazo de estudo sobre o ámbito do goberno local, e nas eleccións de 2004 concorreu por primeiro vez ao Congreso por Barcelona, entón como independente no PSC.

Foron as eleccións que gañou o socialista José Luis Rodríguez Zapatero e no Congreso tivo un papel relevante na Comisión Constitucional. En 2008 afiliouse ao PSC e nas eleccións dese ano xa repetiu escano por Barcelona, pero xa non figuraba como independente.

Co PSC repetiu escano nas xerais de 2011 e, xunto co resto de deputados socialistas cataláns, desmarcouse do PSOE de Alfredo Pérez Rubalcaba en dúas votacións sobre o dereito de autodeterminación.

Nas primarias de 2014 polo liderado do PSOE, Meritxell Batet apoiou a Eduardo Madina, pero o gañador daqueles comicios internos, Pedro Sánchez, decidiu recuperala e entregoulle a Secretaría de Estudos e Programas da súa primeira Executiva Federal do PSOE.

Desde entón forma parte do círculo de confianza do líder do PSOE, que mesmo a elixiu como número dous da lista por Madrid coa que aspiraba por primeira vez á Moncloa. Cando se repetiron as eleccións en 2016, o primeiro posto da lista do PSOE por Barcelona estaba vacante, xa que Carme Chacón renunciara á reelección, e a dirección socialista entregoullo a Batet.

Como o resto de deputados do PSC, Meritxell Batet rompeu tamén a disciplina de grupo na investidura de Mariano Rajoy rexeitando a abstención ordenada pola xestora do PSOE e secundando o 'Non é Non' que popularizara Pedro Sánchez. Ese voto custoulle a saída da dirección do Grupo Socialista.

Tras a volta de Pedro Sánchez ao liderado do PSOE, Batet volveu á dirección parlamentaria do PSOE no Congreso e tras a moción de censura o líder do PSOE chamouna ao seu Goberno como ministra de Política Territorial, cun papel relevante nas relacións con Cataluña.

Agora sobe un banzo máis ao acceder á Presidencia do Congreso, a terceira autoridade do Estado que en ocasións substitúe á Coroa ou ao Goberno en actos internacionais e tomas de posesión de xefes de Estado. É a primeira catalá que preside a Cámara Baixa desde a ditadura.

Batet, divorciada e nai de dúas fillas xemelgas, estivo casada durante dez anos con José María Lassalle, un destacado deputado do PP que foi secretario de Estado de Cultura con Mariano Rajoy.