Menos investimento do maior fondo soberano do mundo na mineira de Touro

O Norges Bank Investment Management (NBIM) é o banco público de Noruega e xestiona o maior fondo público de investimentos. Acaba de publicar os seus datos sobre os seus negocios en España, entre os que está Atalaya Minning. Esta multinacional opera a mina de Río Tinto (Huelva) e está detrás do polémico proxecto para reabrir a mina de Touro - O Pino.

Comparecencia do Norges Bank en 2013 | Norges Bank Attribution-NoDerivs 2.0 Generic (CC BY-ND 2.0)

O valor dos investimentos de NBIM en Atalaya Minning PLC, é de 6,83 millóns de euros, o que supón unha rebaixa do 39% do valor. Isto pódese explicar  ben por desinversión ou pola caída do valor das accións, cotizadas na bolsa de Londres. 

Dado que o valor das accións de Atalaia Mining aumentou o último exercicio (de 165 libras a  210 libras), pódese deducir que os noruegueses venderon parte das súas participacións na mineira.

Na actualidade, o banco, que xestiona o fondo de pensións de Noruega, controla o 2,13% do capital. Na última xunta de accionistas, votou a favor de todas as propostas da dirección.

A XUNTA, PENDENTE DE DAR VEREDICTO

Tras anos de tramitación, a reapertura de mina de Touro segue no tellado de la Xunta. Os continuos problemas ambientais que xera a actual explotación, co SEPRONA investigando vertidos recentemente, xoga na súa contra. 

Dado o gran rexeitamento xerado en boa parte do tecido social da zona e o apoio que lle prestan os dous alcaldes locais do PP, parece improbable que o Goberno Galego tome unha decisión final antes das eleccións de primavera.