"Absolutamente falso" que se cobre a ORA irregularmente

O Concello de Ourense nega que se cobre irregularmente pola ORA, como denunciou o partido Adiante Ourense. "É absolutamente falso" explican fontes oficiais consultadas por Galiciapress.

Benito Iglesias, candidato a la alcaldía por Adelante Ourense

Adiante Ourense alertou, entre outros puntos, que a ordenanza municipal fixa en 1,5 euros a tarifa por anular unha denuncia, pero está a cobrarse dous euros. Efectivamente, no artigo 9 da "Ordenanza reguladora do servizo de ordenación e regulación do aparcamento de vehículos na vía pública (Ou. R.A)", publicada na web oficial figura unha tarifa de 1,5 euros. Desde o servizo de prensa se reabate que as tarifas vixentes oficialmente son de dous euros e remítese unha captura de pantalla desa ordenanza.

HAI QUE PAGAR OU NON NALGUNHAS RÚAS?

Outro dos puntos en discusión é se o Concello pode cobrar a ORA en vías das que non é titular. O partido de Benito Iglesias (Presidente Federacion Galega de Empresas Inmobiliarias, ex-do PP e Cidadáns), asegura que é "irregular" o cobro en rúas como Progreso, Concordia, Sáenz Díez ou a avenida de Buenos Aires.

De feito, anima a non pagar e advirte dun posible delito se o municipio non precinta os parquímetros nestas rúas. O Departamento de Comunicación do Concello responde que "o aparcadoiro é unha materia de ordenación do tráfico e, por tanto, competencia municipal".