"Proxecto Home avanza inexorablemente cara ao colapso"

A Inspección de Traballo constata irregularidades en Proxecto Home e abre expediente por "infracción grave"

Un informe da Xefatura Provincial na Coruña de Inspección de Traballo sobre Proxecto Home constata irregularidades laborais e na xestión de recursos humanos por parte desta entidade. O documento, que difundiu Comisións Obreiras, recolle que se fixeron horas extra de forma irregular, entre outras cuestións.

Unha pasada rolda de prensa de CCOO sobre este conflito

HORAS DE MÁIS E VULNERACIÓN DO CONVENIO

"Constátase que durante 2017 os traballadores monitores de noite prestaron xornadas anuais que excede a xornada anual fixada no convenio colectivo, debendo ter devanditos excesos a consideración de horas extra --superando o límite de 80 anuais-- polo que se procede a iniciar o procedemento sancionador mediante a correspondente acta de infracción pola comisión dunha infracción grave en materia de tempo de traballo", sinala nun dos puntos a Inspección de Traballo.

Ademais, a entidade laboral constata que "a empresa non a aplicado" o convenio colectivo en caso de incapacidades temporais dos seus traballadores ata a porcentaxe fixada, do 100 por cen. "Nos supostos de incapacidade temporal por enfermidade profesional ou accidente, se  complementará a prestación derivada destas continxencias desde o primeiro día de enfermidade ou accidente ata alcanzar o 100 por cen da base aplicable", recolle o convenio, con algunha excepción en canto á porcentaxe do persoal con incapacidade temporal.

SEN CATEGORÍAS

No informe de Inspección de Traballo, tamén se convida a "dirixirse aos órganos xurisdicionais se consideran vulnerado algún dereito fundamental dos traballadores" e inclúe no seu informe que terapeutas en formación encadrábanse na mesma categoría que conserxe, repartidor ou persoal de limpeza, pero sinala que a autoridade laboral "non pode esixir o cumprimento do convenio colectivo na materia" ao estar suspendidos por acordo do descolgue salarial do convenio colectivo estatal.

Doutra banda, a inspección emitiu un requirimento para reclamar que se poña un taboleiro de anuncios informativo, así como para que a empresa cumpra coa obrigación legal de información, consulta e participación. Tamén se advertiu á empresa de que debía cumprir a provisión de postos de nova creación e vacantes polos principios de igualdade de oportunidades, transparencia, publicidade e competencia técnica.

"DEIXA EN EVIDENCIA AS MENTIRAS"

O sindicato CC OO considera que a inspección "deixa en evidencia as mentiras da xerencia" de Proxecto Home e "demostra que non falaba por falar" cando denunciaba a situación na Fundación Monte do Gozo-Proxecto Home Galicia.

Así, o secretario de Acción Sindical de CC OO-Servizos, Juan Zas, aféalle a Proxecto Home as "mentiras" sobre o cumprimento do convenio colectivo. "Fixéronse horas extra vulnerando a lei e a empresa quixo manchar a reputación do sindicato nos medios de comunicación, mentindo obscenamente", declarou.

Para Comisións Obreiras, este "importantísimo" proxecto social "avanza inexorablemente cara ao colapso por culpa dunha única persoa". O sindicato non "esixir responsabilidades" ao padroado da fundación, como responsables últimos da situación": "Se non son capaces de garantir a súa viabilidade deben permitir que outras persoas asuman as funcións".