A Xunta quere unha licenza VTC por 30 de taxi

A conselleira de Infraestruturas e Vivenda, Ethel Vázquez, trasladou na tarde deste mércores ao Ministerio de Fomento a proposta da Xunta para que estableza un marco legal "que permita suspender a renovación de máis autorizacións e restablecer a cociente 1/30", unha licenza de aluguer de vehículos con condutor (VTC) por cada 30 de taxi.

Vázquez, na reunión mantida na Conferencia Nacional de Transportes convocada por Fomento para abordar a situación do sector, lembrou que o Goberno anterior aprobou en abril de 2018 un real decreto lei, "apoiado polo grupo parlamentario do PSOE no Parlamento", e avogou por que o ministerio "continúe co desenvolvemento do mesmo".

Ademais, defendeu o mantemento da regra dunha licenza de VTC por cada 30 de taxi e "que alí onde non se cumpre a cota 1/30 ou o cociente menos restritiva --se así foi aprobado por algunha comunidade--, as propias comunidades autónomas poidan restituír a situación ao previsto na lei, con medidas como podería ser a posibilidade de que se suspendan as renovacións de licenzas".

Para iso, Ethel Vázquez engadiu que o departamento de José Luis Ábalos "debe dotar os instrumentos legais precisos, xa que se está tratando dunha competencia para lexislar e é básica e exclusiva do Estado, xa que as Comunidades Autónomas non poden suspender as renovacións sen unha norma estatal que as ampare".

"En definitiva, solicitou ao Ministerio de Fomento medidas concretas para conseguir unha competencia leal e equilibrada entre o sector do taxi e os servizos de aluguer con condutor", destaca a consellería a través dunha nota de prensa.

Por último, subliñou que "calquera solución que non pase por garantir o equilibrio no número de licenzas de VTC e de taxi vai desembocar nunha ruptura do mercado e na imposibilidade de garantir o bo servizo aos usuarios e empregos de calidade".