Detido a 190km/h nun tramo de 90

Axentes do Subsector da Agrupación de Tráfico da Garda Civil da Coruña detectaron durante a tarde deste martes, mediante dispositivo de captación e medición de velocidade, ao condutor dun turismo de alta gama, que circulaba en Mazaricos (A Coruña) a 190 quilómetros por hora nun tramo limitado a 90.

ATA TRES ANOS E MEDIO DE MULTA
O condutor, un home de 35 anos natural da localidade de Muros, está a ser investigado por un suposto delito contra a seguridade viaria e podería enfrontarse a unha pena de prisión de tres a seis meses, a multa de seis a doce meses ou a traballos en beneficio da comunidade de trinta e un a noventa días. En calquera caso, será privado do permiso de conducir entre un e catro anos.

Desde a Agrupación de Tráfico recoméndase extremar a precaución na condución de vehículos a motor, respectando os límites de velocidade. Neste sentido, os axentes lembran que, desde que se puxo en marcha a Lei de permiso por puntos, máis dun 40% das sancións e máis dun 48% dos puntos detraídos fórono por exceso de velocidade.