Caballero ve unha mostra de "ineficiencia" da Xunta subir o canon de Sogama

O alcalde de Vigo, Abel Caballero, mostrou este sábado o seu rexeitamento á subida do canon de Sogama e criticou que a Xunta pretenda que os vigueses paguen a "ineficiencia".

"Rexeitamos totalmente o incremento do canon de Sogama por parte da Xunta, que Vigo terá que pagar polos residuos sólidos", afirmou en declaracións difundidas aos medios.

O rexedor, que explicou que o asunto será abordado no pleno municipal de luns, sostivo que Sogama é "profundamente ineficiente" e é un "monopolio". "Queren que Vigo cubra, co diñeiro da xente de Vigo, a ineficiencia da Xunta", censurou o alcalde, que acusou á Xunta de "tomarlle o pelo" á cidade.

O alcalde explicou que o Grupo Socialista tamén exporá ao a Xunta e á Consellería de Educación que non peche a aula de cuarto de infantil do Colexio Balaídos ao considerar que "vai empeorar a calidade educativa e vai baixar o número de profesores".

Por último, Cabaleiro destacou que pedirán á Xunta que mellore os recursos da área sanitaria de Vigo para a saúde mental e, en xeral, para todo o relativo coa atención sanitaria na cidade, que cualificou de "moi deficiente".