Galicia comeza a surfear a primeira onda de gripe, que rexistra unha tendencia decrecente

A gripe mantense en Galicia cunha intensidade media e con tendencia decrecente, segundo publicou a Consellería de Sanidade no seu informe de actividade das infeccións respiratorias agudas correspondente á semana do 15 ao 21 de decembro.
 

Segundo os datos recolleitos polo servizo de vixilancia epidemiolóxica da Dirección Xeral de Saúde Pública, xa se alcanzou o pico da onda epidémica da gripe.

Respecto da semana anterior, rexistrouse un descenso na taxa de consultas por gripe en atención primaria dun 5%. Esta taxa sitúase en 103,7 consultas por cada 100.000 habitantes.

O grupo coa maior taxa de consultas continúa sendo o de 0 a 4 anos (250,3 consultas por 100.000 habitantes), seguido do de cinco a 19 anos, con 155,4 consultas por 100.000 habitantes.
 

En canto a áreas sanitarias, a taxa de consultas foi inferior en todas elas respecto da semana anterior. En canto aos ingresos hospitalarios, na última semana ingresaron 339 persoas con gripe confirmada, un 12,6% menos que a pasada semana (387 ingresos).
 

O descenso da taxa de ingresos observouse en todos os grupos de idade, "sendo moi significativo no grupo de 0 a catro anos (77,7%). O grupo de 80 e máis anos representa a taxa de ingresos máis elevada con 63,6 ingresos por 100.000 habitantes, aínda que diminuíu un 50% respecto da semana 50.

Por áreas sanitarias, a taxa de ingresos baixou en todas menos na de Santiago, onde permaneceu estable, e na de Ourense, onde aumentou un 25,3%.
 

No que vai de tempada da gripe notificáronse 2.426 ingresos, a maioría deles con virus tipo A.