Roberto Barba fala de "descontextualización" das súas palabras: "O problema non é da muller"

O director xeral de Loita contra a Violencia de Xénero, Roberto Barba, defendeu este domingo que as súas declaracións sobre as rupturas como "detonante" nos asasinatos machistas se "descontextualizaron". Neste sentido, detallou que "moitas veces cando se produce un asasinato é nese momento de ruptura", pero insistiu en que "non é que sexa problema da muller, evidentemente".

Así o destacou nunha entrevista con RNE e recollida por Europa Press, tras transcender que, nas alegacións presentadas polo seu departamento ao informe do Consello de Contas sobre as actuacións en materia de prevención durante o período 2018-2022, sostivo que "un dos motivos ou detonantes" que leva ao agresor "a acabar coa vida da muller" é "a decisión dela de deixalo e pór fin á relación que mantiñan".

"Ese informe ten máis de 100 follas, o que dixemos é que as políticas de prevención e sensibilización non son suficientes, sigo dicíndoo, non son suficientes, temos que complementalas con outras políticas. Se sacamos tres liñas dun parágrafo de 50, ao final, vemos o que queremos ver", subliñou.

Ademais, nas súas declaracións, e despois de que o Consello de Contas apremase no seu informe ao Executivo autonómico a asignar máis recursos á prevención, cuxas políticas tiveron un "peso residual" en 2022, Roberto Barba apostou por aglutinar as políticas de prevención e sensibilización "con políticas proactivas e recursos proactivos".

Consultado sobre que lle diría a unha muller que quere deixar a relación coa súa parella e teme pola súa vida, o director xeral fixo fincapé en que "para unha muller que teme pola súa vida, un día aguantando unha agresión é un día con risco".

"Si 7 cada 10 mulleres denunciasen, estou seguro que moitas delas, ou practicamente todas, estarían hoxe vivas. Estamos a dicilo sempre, hai que denunciar, se presentas unha denuncia, é unha maneira de salvar. É a única maneira de saír e a única maneira, moitas veces, de pór a salvo", reivindicou.

"Unha muller hoxe ten á súa disposición os programas e os recursos da Xunta e sae do seu fogar en menos de dúas horas, ou con escolta, a unha casa de acollida, cunha pulseira telemática ou cun recurso económico e habitacional á súa disposición, e automaticamente un recurso laboral para traballar á súa disposición", asegurou.