O SERGAS admite o seu erro: oito meses sen avisar a un paciente de Vigo que tiña cancro

A Consellería de Sanidade deberá compensar con 25.000 euros á filla e a viúva dun paciente do Hospital Álvaro Cunqueiro de Vigo que non foi informado durante oito meses de que tiña un tumor no ril. O home, de 64 anos, faleceu en abril de 2022.

Nunha resolución recente, a Administración autonómica recoñece que a demora na comunicación do diagnóstico supuxo unha "perda de oportunidade dunha mellor evolución" para o paciente. A familia presentara unha reclamación coa asistencia da avogada viguesa Miriam Barral.

Oito meses sen respostas

Todo comezou o 25 de marzo de 2020, en pleno inicio do confinamento pola COVID-19, cando o home acudiu ao centro de saúde tras detectar sangue nos ouriños. Foi derivado de maneira urxente a Urología , e en abril realizáronlle diversas probas, entre elas un urotac. Con todo, ninguén se puxo en contacto con el para informarlle dos resultados.

Non foi até o 4 de decembro de 2020, cando o paciente acudiu novamente ao médico por unha forte lumbalxia, que o facultativo revisou o seu historial e descubriu que tiña un urotac pendente desde abril. Ao preguntarlle se fora visto polo urólogo, o home respondeu: "Ninguén me chamou, supuxen que todo estaba ben".

Tras esta consulta, foi remitido de novo a Urología , onde o 14 de decembro informáronlle de que tiña un tumor de cinco centímetros, que xa afectaba á pelvis renal.

Un erro sen explicación

Durante a tramitación do expediente, nin o servizo de Urología nin o departamento de Admisión do hospital puideron explicar por que o informe do urotac non fora avaliado antes.

O propio paciente iniciou o proceso de reclamación en novembro de 2021, meses antes de falecer o 17 de abril de 2022. Tras a súa morte, a súa filla asumiu o expediente e reclamou máis de 120.000 euros en total para ela e a súa nai.

Inicialmente, a Consellería de Sanidade rexeitou concederlles unha indemnización. No entanto, un ditame do Consello Consultivo, emitido o 31 de xullo de 2024, concluíu que si debía recoñecer unha compensación de 25.000 euros.

Aínda que a familia podería recorrer para reclamar unha maior indemnización, a súa avogada sinala que o seu obxectivo principal era que a Administración recoñecese o erro cometido, máis aló do importe económico.