Adeslas e DKV amagan con denunciar a Muface que valora facer unha nova oferta

As compañías aseguradoras Adeslas e DKV anunciaron a súa intención de presentar unha demanda contra o Goberno español para reclamar compensacións polos desequilibrios económicos sufridos durante a vixencia do convenio de colaboración con Muface (2021-2024). Ambas as entidades afirman acumular unhas perdas conxuntas de 326 millóns de euros debido ás condicións actuais do acordo, segundo adianta hoxe Cinco Días.

Muface, o organismo que xestiona a asistencia sanitaria dos funcionarios públicos do Estado, mantén un sistema que combina prestación pública e privada para cubrir a 1,5 millóns de persoas en España, incluíndo 950.000 mutualistas e os seus familiares. En Galicia, onde preto de 50.000 mutualistas están inscritos neste modelo, o impacto dun eventual abandono podería supor un enorme desafío para a sanidade pública xestionada polo Sergas, que debería absorber este volume adicional de pacientes.

A problemática xorde das cotas que o Estado destina ás aseguradoras por cada mutualista. Segundo as compañías, estas achegas non cobren os gastos sanitarios reais, especialmente nun contexto de inflación e aumento de custos nos servizos médicos. Adeslas e DKV advertiron que, sen unha revisión inmediata das condicións económicas, non renovarán a súa participación no próximo convenio. Asisa, a única esperanza para miles de mutualistas, segue dubidando.

Demandas ao Goberno e futuro incerto

As aseguradoras solicitaron ás Executivo melloras substanciais nas cotas e outras garantías que aseguren a viabilidade do sistema. En caso contrario, poderían interpor unha demanda polas perdas acumuladas. Este paso xa o deron outras empresas como Mapfre, Caser e Sanitas, que abandonaron o sistema en anteriores renovacións. Dado o avance dos seguros privados, este tipo de compañías cada vez depende dos clientes que lles proporciona Muface.

O Ministerio de Facenda ten como data límite o 27 de xaneiro para recibir propostas das aseguradoras para o novo convenio 2025-2027. Segundo fontes oficiais, o Goberno traballa nun reaxuste das condicións, aínda que estas seguramente chegan tarde para evitar a saída de Adeslas e DKV. Está por ver si convencen a Asisa.

A situación preocupa especialmente en Galicia, onde o Sergas xa está contra as cordas en moitos servizos, como pediatría ou, especialmente, medicamento de familia. 

Un modelo baixo a lupa

Críticos co sistema de mutualidades destacan que o modelo actual non está a garantir a sustentabilidade financeira das aseguradoras nin dos servizos sanitarios públicos. Adeslas cre a cota fixa achegada pola Administración até agora cobre menos do 70% dos gastos reais. 

Pola súa banda, representantes sindicais dos funcionarios de centrais como o Sindicato Unificado de Policía ou SUP, Unión Federal de Policía UFP ou CSIF levan meses pedindo que se manteña o modelo mixto, ao considerar que unha migración masiva ao sistema público podería sobrecargarlo e deteriorar a calidade asistencial.

De non alcanzar un acordo antes de marzo, cando expira o convenio actual,  Muface podería cesar por completo os seus servizos, deixando no aire a cobertura sanitaria de millóns de funcionarios.  A ministra de Sanidade Mónica García insistiu en que pasaría á Seguridade Social. Na súa opinión, os servizos autonómicos públicos como o SERGAS están capacitados para darlles atención, porque os mutualistas supoñen algo así o 2% da poboación.

En Galicia, isto podería traducir en longas listas de espera e unha presión adicional para hospitais e centros de saúde xa saturados. Tamén está a dúbida o futuro dalgúns hospitais e pequenas clínicas que teñen nos mutualistas unha vía de ingresos importante. En definitiva, o desenlace das negociacións será clave para o futuro deste modelo sanitario en España e Galicia.