A empresa das ambulancias de Vigo "ten 2.000 euros na conta", denuncian sindicatos

Na sede da Consellería de Sanidade celebrouse onte un encontro onde representantes do #Sergas, o 061, os sindicatos #CIG, CC.OO. e USO e da área sanitaria de Vigo trataron con detalle a delicada situación de Ambulancias do Atlántico, concesionaria do servizo urxente do 061 en Vigo , Cangas e Moaña e que hoxe ten telarañas no seu cofre do tesouro, a mínimos e incapaz de cubrir nin sequera os gastos en gasolina.  

Óscar Graña, da CIG, sinala a Galiciapress que os sindicatos salguen "insatisfeitos" da reunión ao saír de alí sen unha solución concreta, tal e como tamén confirmaron a este diario desde o 061, que admite seguir "explorando as posibles alternativas" para abordar este complexo tema que puxo contra as cordas o servizo, aínda que desde emerxencias se remiten aos comunicados dos últimos días garantindo a asistencia "as 24 horas do día os 365 días do ano". 

SEN FOLLA DE RUTA, PERO CUN CONCURSO EN CAMIÑO

No entanto, os sindicatos demandaban desde o pasado venres unha "folla de ruta" que establecese os pasos a seguir por parte da administración, despois do compromiso da semana pasada de desvincular a Ambulancias do Atlántico dos contratos que manteñen como concesionaria do servizo urxente, ademais do servizo programado, que a CIG pediu sacar de maneira reiterada "inmediatamente a concurso en todo o país", solicitude que parece ser atendida e que o sindicato valora como "único punto positivo" do diálogo iniciado entre as partes. Ao longo das próximas semanas coñeceranse máis detalles ao redor da licitación, aínda que para o servizo programado, reafirma a CIG, a solución chega tarde. 

Por agora, a intervención a Ambulancias do Atlántico e o seu xerente, Carlos Simón, segue no aire, a pesar de que os sindicatos creen "dabondo demostradas" as "irregularidades" que hoxe incapacitan á firma para prestar este servizo fundamental. "Dinnos que necesitan algo máis de prazo", detalla Graña, á vez que informa de que están convocados para unha nova reunión nuns días, chamada que os sindicatos recibiron cunha advertencia: "Non imos tolerar un novo encontro onde non se nos acheguen prazos concretos e fórmulas precisas. A pelota está no tellado da Consellería e non está a cousa como para facer máis concesións". 

NÓMINAS SEN PAGAR

No relativo ao capítulo da falta de pagamentos, se onte a propia empresa comezou a abonar algúns pagos -"Non a todos os afectados nin na súa totalidade", apuntaban desde a CIG-, agora o Sanidade a que propón para garantir o cobro das nóminas de abril, adiantando a facturación á compañía para que poida realizar os pagos aos empregados. "Se ese diñeiro vai a Ambulancias do Atlántico non sabemos que vai pasar por el", recela Graña, consciente da precaria situación das arcas da firma. 

En calquera caso, parece imposible que hoxe Ambulancias do Atlántico poida asumir ningún pago máis por si mesma, considerando, entre outras, as débedas pendentes que ten en gasolineiras e talleres. "Desde oficinas dinnos que a empresa ten hoxe 2.000 euros na conta", lamenta Graña. 

Por outra banda, o encontro serviu aos sindicatos para reprochar á Xunta a súa xestión neste asunto. "Non fixo ben o seu traballo, a súa responsabilidade de velar de saber onde ía parar ese diñeiro público que acabou desaparecendo. Facémolos responsables a maiores do empresario. Que ese diñeiro non o teña Ambulancias do Atlántico non quere dicir que non o teña Carlos Simón", reprende Graña, que pon en dúbida que o empresario se atope nun momento comprometido no que á súa economía persoal refírese.

Á espera do que ocorra no próximo encontro, fixado para o venres 26 de abril, os sindicatos anuncian que seguen con paso firme tras comunicar o preaviso de folga e agora convocaron asembleas para establecer os seus próximos pasos a dar, con xornadas de folga pensadas nun primeiro momento para os días 2 e 3 de maio.