O mal uso de 'Viana del Bollo' ou 'Ginzo' é responsabilidade do Colexio de Rexistradores, responde a Xunta á Mesa

Ginzo de Limia, Viana del Bollo ou Sangenjo son algúns dos nomes deturpados máis habituais en Galicia, onde, a pesar das normas que marcan a academia e as normativas, moitas institucións aínda se resisten a utilizar os nomes oficiais dalgúns municipios. Así, podemos ver que correos electrónicos e oficinas liquidadoras locen aínda estes nomes deturpados, para ruborizo de moitos e enfado da Mesa pola Normalización Lingüística. 

A plataforma buscou explicacións a que isto siga sucedendo e atopouse cunha comunicación da Xunta de Galicia onde admiten o uso destes nomes deturpados pero responsabilizando ao Colexio de Rexistradores da Propiedade e Mercantil de España do seu uso. É a directora de la Axencia Tributaria de Galicia a que desliza as cargas ao outro organismo "por ser o propietario dos dominios que se empregan". 

As explicacións, a pesar de todo, non resultaron satisfactorias para a organización, que acusa o Goberno de Galicia de "sinalar a terceiros as súas propias vulneracións" e "delegar responsabilidades" en lugar de facer cumprir a lexislación.

Desde A Mesa enténdeno como "un ataque directo que a Xunta está a permitir á lexislación que debe facer cumprir, entre as que se atopan a Lei de normalización lingüística, o Decreto para a recuperación e fixación da toponimia, o Decreto polo que se aproba o nomenclator ou mesmas sentenzas como a do Tribunal Supremo de 19 de setembro de 2001 ou do Constitucional de 21 de decembro de 1989".

"NON É UN FEITO ILLADO"

Marcos Maceira, presidente da Mesa, subliña que este "non é un feito illado" e que a estas institucións "ténselles que presupor o cumprimento escrupuloso da legalidade", especialmente cando "os seus membros son precisamente as persoas habilitadas para sinalar a localización e nome das propiedades".

"Os ataques á toponimia galega, única lexítima e legal adoitan ter o amparo do presidente da Xunta, que ten o deber de facer respectar a lexislación e promover a lingua galega", censura Maceira, lembrando ocorrer nos últimos anos na Toxa, que vincula ao "desprezo que sente o señor Rueda polo galego, por Galicia e polo mesmo cargo que ocupa".