Galicia arrinca a semana con máis hospitalizados pero coa cifra máis baixa de casos de Covid en máis dun ano

Con 653 casos activos, a comunidade galega rexistra o seu número máis baixo de enfermos de coronavirus desde o 3 de novembro de 2021. As cifras nestes momentos non prognostican un aumento de casos nin un cambio de tendencia a curto ou medio prazo. 

A situación é de estabilidade xeneralizada, salvo no apartado dos hospitalizados, que experimenta un lixeiro repunte con respecto ao sábado, ao pasar de 116 ingresados en planta aos 121 de hoxe. En UCI hai nove pacientes con Covid nestes momentos.

A pesar de todo, a cifra de contagios segue sendo realmente baixa, con só 26 novos positivos detectados nas últimas horas, unha situación que se debe, en gran medida, ao número de casos que pasan "desapercibidos" para as autoridades sanitarias.  

O Servizo Galego de Saúde (#Sergas) notificou un ascenso dos ingresados con covid-19 ao longo do fin de semana, até alcanzar os 130 en toda Galicia. Con todo, desde o venres continuou a tendencia descendente nos casos activos, que se sitúan nos 653.

Segundo cifras ofrecidas pola Consellería de Sanidade actualizadas ás 18,00 horas do domingo, desde o venres --últimos datos coñecidos-- subiron en seis os hospitalizados con coronavirus. En concreto, son 121 en planta --cinco máis-- e nove en unidades de coidados intensivos --un máis--.
 

Por áreas sanitarias, descendeu a cifra de ingresados na de Ourense-Verín-O Barco de Valdeorras, que contabiliza 18 (-2); e en Pontevedra-O Salnés, con 17 (-1). Mentres tanto, a cifra mantívose invariable na de Santiago-Barbanza, tamén con 17, e na de Ferrol, con 10.

En cambio, os hospitalizados creceron nas tres áreas restantes. Na da Coruña, até alcanzar os 41 (+6); en Lugo-A Mariña-Monforte, até os 14 (+2); e en Vigo, a 13 (+1).

No que respecta aos casos activos, é dicir, persoas que están a atravesar a enfermidade, en toda Galicia sitúanse en 653 tras caer en 105 ao longo do fin de semana.

A baixada replícase nas sete áreas sanitarias. A da Coruña segue na cabeza cun total de 149 pacientes covid contabilizados (-11). Séguenlle Santiago, con 113 (-22); Lugo, con 107 (-19); Vigo, con 97 (-19); Ourense, con 74 (-15); Pontevedra, con 67 (-5); e Ferrol, con 45 casos activos (-14).

Todo iso despois de que o Sergas rexistrase oficialmente 57 novos positivos por coronavirus desde o venres. Con todo, non notificou ningún falecemento relacionado coa pandemia, polo que o número de vítimas en Galicia mantense en 4.055.