Terminan nove meses de folga en otorrinolaringoloxía do SERGAS en Santiago cun acordo
Miles de consultas perdéronse neste tempo. Unha das principais reivindicacións era a suspensión do xefe de servizo, Carlos Martín Martín, ao que os seus compañeiros acusaron de repartición desigual da carga de traballo.
A dirección da área sanitaria de Santiago do Sergas e os representantes dos traballadores asinaron este mércores o acordo que pon fin a nove meses de paros no servizo de otorrinolaringoloxía do Complexo Hospitalario Universitario de Santiago.
Así o trasladou a federación de Sanidade de CCOO nun comunicado no que expresan que a firma do acordo "abre unha nova etapa" no servizo de ORL do Clínico co final dunha folga que arrincou en decembro de 2021.
O sindicato incidiu en que manterán "unha actitude vixiante" sobre o cumprimento do acordo e estende unha mensaxe de agradecemento á poboación da área compostelá "polo seu apoio, paciencia e comprensión" durante os meses de mobilización.
Neste sentido, Comisións remarca que "o único que moveu" aos traballadores foi a intención de prestar á cidadanía "un servizo de calidade, porque é o seu dereito".
Escribe o teu comentario