Camioneiro trata de "curar" a bebedeira con churrasco tras ser pillado ao volante pola Garda Civil en Verín
O investigado, que quintuplicaba o nivel permitido no test de alcoholemia, dixo aos axentes que "ía cear un churrasco" mentres esperaba a que se lle baixase a bebedeira.
A Garda Civil de Ourense interceptou na autovía A-52 ao seu paso por Verín a un camioneiro que quintuplicaba a taxa máxima de alcol permitida para condutores profesionais.
En concreto, eran as 20,50 horas deste domingo cando unha patrulla da Garda Civil foi requirida para auxiliar ao condutor dun vehículo articulado que circulaba transportando mercadorías desde O Carballiño a Madrid e que rebentara un pneumático.
Á súa chegada, os axentes notaron que o condutor "desprendía un forte cheiro a bebidas alcohólicas", polo que lle efectuaron a proba, que arroxou un resultado positivo de 0,77 e 0,76 mg/l, quintuplicando desta maneira a taxa máxima establecida para este tipo de condutores.
Por todo iso, foi investigado como presunto autor dun delito contra a seguridade viaria. O camión quedou inmobilizado no lugar dos feitos e o home manifestou aos axentes que "ía a un establecemento próximo a cear un churrasco" mentres esperaba a que desaparecese a sintomatología.
Escribe o teu comentario